पुणे : पुण्यातून एक धक्कादायक बातमी समोर येत असून या घटनेने पुणे हादरलं आहे. पुण्यात मागील काही दिवस झाले गुन्हे वाढताना दिसत आहेत. अशातच आता पुण्यातून एक खूनाची घटना समोर आली आहे. सराईत गुंडाचा निर्घृणपणे खून करण्यात आला आहे. या घटनेने एकच खळबळ उडाली आहे.
मिळालेल्या माहितीनुसार, पुण्यात काल (गुरूवारी) मध्यरात्रीच्या सुमारास सिंहगड रस्त्यावर एका सराईत गुंडाचा निर्घृणपणे खून करण्यात आल्याची माहिती समोर आली आहे. सिंहगड रस्त्यावरील एका बारमध्ये दारू पिण्यासाठी बसल्यानंतर किरकोळ वाद झाला आणि त्या वादातूनच मध्यरात्री बारा वाजण्याच्या सुमारास हा धक्कादायक घटना घडली. हनुमंत उर्फ गोट्या शेजवळ असे खून झालेल्या गुंडाचं नाव आहे. याप्रकरणी आरोपी गणेश आकाश कुलकर्णी याला सिंहगड रोड पोलीसांनी अटक केली आहे.
किरकोळ वाद टोकाला गेला..
सिंहगड रोडवरील वडगाव ब्रिज परिसरात क्लासिक बार नावाचे हॉटेल आहे. या हॉटेलमध्ये गुरुवारी रात्री गोट्या शेजवळ दारू पिण्यासाठी बसला होता. यावेळी आरोपी आकाश कुलकर्णी हा देखील त्या ठिकाणी होता. हॉटेलमध्ये किरकोळ कारणावरून दोघांमध्ये वादावादी झाली. यानंतर आरोपी आकाश कुलकर्णी हा हॉटेलमधून बाहेर पडला. त्यावेळी गोट्या शेजवळ याने आकाश कुलकर्णी याचा पाठलाग सुरू केला.
आकाश कुलकर्णीला शेजवळ त्रास देऊ लागला. त्यानंतर हे दोघेही सिंहगड रस्ता परिसरातीलच सुवर्ण हॉटेल जवळ पोहोचले. या ठिकाणी पुन्हा त्यांच्यात वाद झाला. पुन्हा गोट्या शेजवळ आकाश कुलकर्णीला त्रास देऊ लागला. त्यानंतर संतापलेल्या आकाश कुलकर्णीने रस्त्याच्या जवळच असणाऱ्या एका पंक्चरच्या दुकानातील हातोडा घेतला आणि गोट्या शेजवळच्या डोक्यात घातला.
गोट्या शेजवळ रक्ताच्या थारोळ्यात कोसळला यामध्ये त्याचा जागीच मृत्यू झाला. असल्याची माहिती मिळत आहे. घटनेची माहिती मिळताच सिंहगड पोलीस घटनास्थळी दाखल होऊन आरोपी आकाश कुलकर्णी याला ताब्यात घेण्यात आले. रात्री उशिरापर्यंत सिंहगड रोड पोलीस ठाण्यात याप्रकरणी गुन्हा दाखल करण्याची प्रक्रिया सुरू होती.
