Pune News : पुणे : ॐ नमस्ते गणपतये.. त्वमेव प्रत्यक्षं तत्त्वमसि.. त्वमेव केवलं कर्तासि.. असे हजारो महिलांच्या मुखातून अथर्वशीर्ष पठणाचे सामूहिक स्वर उमटले. ऋषिपंचमीच्या पहाटे श्रीमंत दगडूशेठ हलवाई गणपतीसमोर आदिशक्तीच्या मंत्रोच्चाराने वातावरण मंगलमय झाले. कोविड संकटानंतर दोन वर्षांच्या प्रदीर्घ प्रतीक्षेनंतर यंदाच्या गणेशोत्सवात हा सोहळा गणेशभक्तांनी अनुभवला. अथर्वशीर्ष पठण उपक्रमाचे यंदा ३६ सावे वर्ष होते. रशिया आणि थायलंड येथून आलेल्या परदेशी पाहुण्यांनी देखील या उत्सवात सहभाग घेतला.
रशिया आणि थायलंड येथील पाहुण्यांचा देखील उत्सवात सहभाग
श्रीमंत दगडूशेठ हलवाई सार्वजनिक गणपतीसमोर ऋषिपंचमी निमित्त महिलांनी अथर्वशीर्ष पठण करून आदिशक्तीच्या सामर्थ्याची प्रचिती दिली. (Pune News) गणेश नामाचा जयघोष करीत महिलांनी पहाटेच्या मंगलसमयी प्रसन्नतेची अनुभूती दिली. सह पोलीस आयुक्त संदीप कर्णिक, ट्रस्टचे कोषाध्यक्ष महेश सूर्यवंशी, सुवर्णयुग तरुण मंडळाचे अध्यक्ष प्रकाश चव्हाण, यतिश रासने, अमर कोद्रे, सौरभ रायकर, मंगेश सूर्यवंशी, राजाभाऊ घोडके, ज्ञानेश्वर रासने, विलास रासकर, उपक्रम प्रमुख शुभांगी भालेराव, अर्चना भालेराव या वेळी उपस्थित होत्या.
महिलांनी शंखनाद केल्यानंतर ॐकार जप आणि अथर्वशीर्ष पठण करीत गणरायाला नमन केले. हात उंचावून टाळ्यांचा गजर करीत महिलांनी गजाननाला अभिवादन केले. (Pune News) मोबाईलचा प्रकाश उंचावून महिलांनी गणरायाचा जयघोष केला. पारंपरिक पेहरावातील महिलांनी पहाटेपासूनच अथर्वशीर्ष पठणासाठी उत्सव मंडपासमोर गर्दी केली होती. हुतात्मा चौकापर्यंतचा परिसर महिलांच्या शिस्तबद्ध रांगेने भरून गेला होता. गणेशोत्सवाचा गौरव वाढविणारा हा कार्यक्रम असल्याची भावना उपस्थितांनी या वेळी व्यक्त केली.
अधिक बातम्या वाचण्यासाठी येथे क्लिक करा :
Pune News : पुणे महापालिकेअंतर्गत दवाखान्यांत गणेशोत्सव काळात विनामूल्य औषधोपचार
Pune News : पीएमपी बस प्रवासात तरुणीची छेडछाड; रोडरोमिओला पोलिसांनी शिकवला चांगलाच धडा
