उरुळी कांचन, (पुणे) ; बेकायदेशीर गावठी व देशी दारूच्या छुप्या पद्धतीने विक्री करणाऱ्या एका परराज्यातील तरुणाला उरुळी कांचन पोलिसांनी ताब्यात घेतले आहे. शिंदवणे (ता. हवेली) गावच्या हद्दीतील एंजॉय बार अँड रेस्टॉरंट’च्या पाठीमागे शुक्रवारी (ता. 26) ही कारवाई करण्यात आली.
दिलीप राम चिटगिरे (वय-28 वर्षे, सध्या रा. कुंजीरवाडी, ता. हवेली, जि. पुणे, मूळ रा. मानुरके, ता. औरद, जि. बिदर, राज्य कर्नाटक) असे गुन्हा दाखल करण्यात आलेल्या आरोपीचे नाव आहे. याबाबत उरुळी कांचन पोलीस ठाण्यातील पोलीस हवालदार प्रवीण चौधर यांनी उरुळी कांचन पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, शुक्रवारी (ता. 26) सायंकाळी उरुळी कांचन पोलीस ठाण्याचे गुन्हे शोध पथक शिंदवणे परिसरात पेट्रोलिंग करताना गोपनीय बातमीदाराकडून माहिती मिळाली की, ‘एंजॉय बार अँड रेस्टॉरंट’च्या पाठीमागे मोकळ्या जागेत एक इसम बेकायदेशीरपणे देशी दारूची विक्री करत आहे. माहिती मिळताच पथकाने तात्काळ वरिष्ठांच्या मार्गदर्शनाखाली पंचांसह सदर ठिकाणी छापा टाकला.
यावेळी मोकळ्या जागेत एक इसम हातात पुठ्ठ्याचा बॉक्स घेऊन बसलेला दिसला. बॉक्समध्ये ‘टँगो पंच’ नावाच्या दारूच्या बाटल्या (जप्त करण्यात आल्या. सदरची कारवाई उरुळी कांचन पोलीस ठाण्याचे पोलीस निरीक्षक विजयमाला पवार यांच्या मार्गदर्शनाखाली गुन्हे शोध पथकातील पोलीस उपनिरीक्षक अशोक खोमणे, पोलीस हवादार प्रविण चौधर, सचिन जगताप, निलेश जाधव, क्षिरसागर यांनी केली.
याप्रकरणी पोलीस हवादार प्रविण चौधर यांनी दिलेल्या फिर्यादीवरून उरुळी कांचन पोलीस ठाण्यात गु.र.नं. १५८/२०२६, महाराष्ट्र दारूबंदी कायदा कलम ६५ (ई) प्रमाणे कडक गुन्हा दाखल करण्यात आला आहे. बेकायदेशीर कृत्य करणाऱ्यांना उरुळी कांचन पोलिसांचा हा कडक इशारा मानला जात आहे.
