पुणे : MPSC औषध निरीक्षक पदभरती परीक्षेच्या पेपरफुटी प्रकरणात मुंबई पोलिसांच्या गुन्हे शाखेने मोठा खुलासा केला आहे. या प्रकरणातील मुख्य सूत्रधार आणि कौटिल्य अकॅडमीचा चालक प्रवीण पाटील याने MPSC मधील अधिकारी गोपाळ मराठेच्या मदतीने हा संपूर्ण कट रचल्याचे तपासात निष्पन्न झाले आहे.
तपासात समोर आलेल्या माहितीनुसार, अटकेत असलेला MPSC चा सहायक कक्ष अधिकारी गोपाळ मराठे हा प्रवीण पाटीलच्या अकॅडमीचा माजी विद्यार्थी आहे. दोघेही एकाच गावचे रहिवासी असल्याने त्यांच्यात जुने आणि घट्ट संबंध होते.औषध निरीक्षक पदाचा पेपर मिळवण्यासाठी प्रवीण पाटीलने गोपाळ मराठेला 5 लाख रुपये दिले होते. गोपाळने ही रक्कम MPSC मधील इतर दोन अधिकाऱ्यांना पोहोचवल्याचे उघड झाले आहे.
MPSC मध्ये कार्यरत असलेल्या गोपाळ मराठेनेच पदाचा गैरवापर करून गोपनीय पेपर बाहेर काढला आणि प्रवीण पाटीलच्या स्वाधीन केला.या रॅकेटप्रकरणी पोलिसांनी आतापर्यंत 6 जणांना गजाआड केले आहे, ज्यामध्ये MPSC च्या 3 अधिकाऱ्यांचा समावेश आहे. गोपाळ मराठे आणि प्रवीण पाटील यांच्या साखळीतून यापूर्वीही काही इतर परीक्षांचे पेपर फुटले आहेत का, याचा शोध आता पोलीस घेत आहेत.
अटक करण्यात आलेल्या सर्व 6 आरोपींची पोलीस कोठडी 2 तारखेला संपत आहे. त्यानंतर आरोपींना पुन्हा न्यायालयात हजर केले जाईल, जिथे पोलीस तपासातील नवीन पुरावे सादर करतील. स्पर्धा परीक्षांच्या पारदर्शकतेवर प्रश्न निर्माण करणाऱ्या या प्रकरणामुळे विद्यार्थ्यांमधून तीव्र संताप व्यक्त होत असून, दोषींवर कठोर कारवाईची मागणी केली जात आहे.
