मुंबई : मुंबई-नागपूर समृद्धी महामार्गावर 26 ऑगस्ट रोजी घडलेल्या एका गंभीर दरोड्याच्या प्रकरणात पोलिसांना यश आले आहे. याप्रकरणी बीड जिल्ह्यातील शिरूर कासार तालुक्यातील हिवरसिंगा येथील किरण अजिनाथ गायकवाड या तरुणाला पोलिसांनी ताब्यात घेतले आहे. समृद्धी महामार्ग पोलीस आणि स्थानिक गुन्हे शाखेने संयुक्त कारवाई करत काल रात्री आरोपीला त्याच्या राहत्या घरातून अटक केली आहे .
हा धक्कादायक प्रकार दुसंगवाडी शिवारात घडला. हिंगोली जिल्ह्यातील लोहगाव येथून एका अतिगंभीर रुग्णाला तातडीच्या उपचारासाठी ‘एर्टिगा’ गाडीतून मुंबईकडे नेले जात होते. आमदार संतोष बांगर यांच्या शिफारस पत्राद्वारे ही वैद्यकीय मदत पुरवली जात होती. प्रवासादरम्यान दरोडेखोरांनी रस्त्यावर लोखंडी वस्तू टाकून गाडीचे इंजिन जाणीवपूर्वक खराब केले. इंजिनमधून ऑइल गळती सुरू झाल्यामुळे चालकाला वाहन थांबवावे लागले.
गाडी थांबताच दरोडेखोरांनी वाहनावर हल्ला केला. प्रवाशांनी प्रतिकार करण्याचा प्रयत्न केला असता त्यांना बेदम मारहाण करण्यात आली. या दरोड्यात चोरट्यांनी चालक किरण खंदारे यांच्या जवळील 7 हजार रुपये रोख, गाडीच्या डिगीतील 34 हजार रुपये, तसेच 2 तोळ्यांची सोन्याची साखळी आणि 5 ग्रॅमची सोन्याची अंगठी असा ऐवज लुटून नेला.
सुदैवाने संबंधित वाहनात कॅमेरा बसवलेला होता. यामध्ये दरोडेखोरांचे चेहरे स्पष्टपणे दिसल्याने पोलिसांना तपासाची दिशा मिळाली. या फुटेजच्या आधारे पोलिसांनी तातडीने कारवाई करत एका आरोपीला जेरबंद केले. चालक किरण खंदारे यांच्या तक्रारीवरून पोलिसांनी गुन्हा दाखल केला असून, अटक केलेल्या किरण गायकवाडसोबत आणखी किती साथीदार होते आणि त्याचा इतर कोणत्या गुन्ह्यांमध्ये सहभाग आहे का, याचा कसून शोध पोलीस घेत आहेत.
