पुणे : पुण्यातील वाकड भागात एका दारूच्या नशेत असलेल्या कार चालकाने रस्त्यावर जोरदार गोंधळ घातल्याची घटना घडली आहे. वाहतूक नियमांचे उल्लंघन केल्यामुळे पोलिसांनी या चालकाला गाडी बाजूला घेण्यास सांगून थांबवले होते. मात्र, त्यानंतर या चालकाने थेट पोलिसांशीच वाद घालण्यास सुरुवात केली.
कार चालकाने पूर्णपणे मद्यपान केलेले असतानाही पोलिसांच्या कारवाईला सहकार्य करण्यास नकार दिला. त्याने ऑन-ड्यूटी पोलिसांना शिवीगाळ करत त्यांना धमकावण्याचा प्रयत्न केला. “कमिश्नरला इथे बोलवा!”, “तुम्ही काय केले?” अशा प्रकारची उद्धट भाषा वापरत त्याने पोलिसांवर अरेरावी केली. या घटनेचा व्हिडिओ कॅमेऱ्यात कैद झाला असून सध्या सोशल मीडियावर त्याचा व्हिडिओ मोठ्या प्रमाणावर व्हायरल होत आहे.
या अचानक उद्भवलेल्या प्रकारामुळे काही वेळेसाठी परिसरात गोंधळाचे आणि तणावाचे वातावरण निर्माण झाले होते. परंतु पोलिसांनी अत्यंत शांततेने आणि संयमाने परिस्थिती हाताळली. शासकीय कामात अडथळा आणणे, पोलिसांशी गैरवर्तन करणे आणि मद्यधुंद अवस्थेत वाहन चालवणे याप्रकरणी वाकड पोलीस ठाण्यात संबंधित कार चालकाविरुद्ध गुन्हा नोंदवण्यात आला आहे.
दारू पिऊन वाहन चालवणे आणि वाहतूक पोलिसांशी गैरवर्तन करण्याच्या वाढत्या घटनांमुळे नागरिकांमधून तीव्र संताप व्यक्त होत आहे. सार्वजनिक ठिकाणी अशा प्रकारे कायदा आणि सुव्यवस्थेचा प्रश्न निर्माण करणाऱ्या अशा बेजबाबदार वाहन चालकांवर कठोर कारवाई करण्याची मागणी स्थानिक नागरिक करत आहेत. वाकड पोलीस या संपूर्ण प्रकरणाचा पुढील तपास करत आहेत.
