पिंपरी-चिंचवड: पिंपरी-चिंचवडमधील नवी सांगवी परिसरात इन्स्टाग्रामवर झालेल्या ओळखीचा गैरफायदा घेत एका ३० वर्षीय विवाहित महिलेची ५ लाख ३ हजार रुपयांची ऑनलाइन फसवणूक करण्यात आली आहे. लग्नाचे आमिष दाखवत यूकेहून महागडे दागिने, डायमंड, आयफोन आणि इतर भेटवस्तू पाठवल्याचे सांगून आरोपींनी महिलेकडून मोठी रक्कम उकळल्याचा प्रकार समोर आला आहे. याप्रकरणी सांगवी पोलिस ठाण्यात गुन्हा दाखल करण्यात आला असून आरोपींचा शोध सुरू आहे.
पोलिसांनी दिलेल्या माहितीनुसार, फिर्यादी महिलेची इन्स्टाग्रामवर एका व्यक्तीशी ओळख झाली होती. त्याने लग्नासाठी मुलगी शोधत असल्याचे सांगून महिलेचा विश्वास संपादन केला. काही दिवसांनंतर त्याने यूकेहून महागडे दागिने, डायमंड, कपडे, फुटवेअर आणि आयफोन असलेले पार्सल पाठवल्याचा दावा केला.
यानंतर स्वतःला डीएचएल कुरिअर कंपनीचा कर्मचारी असल्याचे सांगणाऱ्या दुसऱ्या व्यक्तीने महिलेशी संपर्क साधला. पार्सल भारतात पोहोचले असून ते सोडवण्यासाठी कस्टम ड्युटी भरावी लागेल, असे सांगत आरोपीने टप्प्याटप्प्याने ५ लाख ३ हजार रुपये ऑनलाइन भरायला लावले.
मात्र एवढ्यावरच आरोपी थांबले नाहीत. पार्सलच्या इन्शुरन्सच्या नावाखाली आणखी ५ लाख ८० हजार रुपयांची मागणी करण्यात आली. यावेळी महिलेला संशय आल्याने तिने तत्काळ पोलिसांकडे धाव घेत तक्रार दाखल केली.
या प्रकरणी सांगवी पोलिस ठाण्यात भारतीय न्याय संहिता कलम ३१८(४), ३१६(२) तसेच माहिती तंत्रज्ञान कायद्यातील कलम ६६-डी अंतर्गत गुन्हा दाखल करण्यात आला आहे. या ऑनलाइन फसवणुकीमागील आरोपींचा शोध सुरू असून पुढील तपास पोलीस नाईक नांदेकर करत आहेत.
