उरुळी कांचन, (पुणे) : सोरतापवाडी (ता. हवेली) गावच्या हद्दीत श्री स्वामी समर्थ मठात देवदर्शनासाठी निघालेल्या एका महिलेला रस्त्या ओलांडताना भरधाव दुचाकीने धडक दिली. या धडकेत महिला जखमी झाली असून दुचाकीचालकावर उरुळी कांचन पोलीस ठाण्यात गुन्हा दाखल करण्यात आला आहे. ही घटना गुरुवारी (ता. 25) रात्री आठ वाजण्याच्या सुमारास कांबळे बाग सोरतापवाडी येथे घडली.
पुजा भिवसेन जाधव असे अपघातात जखमी झालेल्या महिलेचे नाव आहे. याबाबत जाऊ निर्मला बापु जाधव (वय 38, व्यवसाय-गृहिणी, रा. सोरतापवाडी, ता. हवेली, जि. पुणे; मूळ रा. गाडीमोड खामगाव, ता. दौंड) यांनी उरुळी कांचन पोलीस ठाण्यात फिर्याद दिली. त्यानुसार पोलिसांनी प्रतिक बाळासो भिसे (वय 23, रा. कासुर्डी, ता. दौंड) याच्यावर गुन्हा दाखल केला आहे.
पोलिसांनी दिलेल्या माहितीनुसार, फिर्यादी निर्मला जाधव या आपल्या कुटुंबासह सोरतापवाडी येथे राहतात. गुरुवारी रात्री आठ वाजण्याच्या सुमारास निर्मला जाधव, त्यांची जाऊ पुजा भिवसेन जाधव आणि पुतणी मानसी अशा तिघीजणी कांबळे बाग सोरतापवाडी येथील सोलापूर-पुणे रोडच्या बाजूला असलेल्या श्री स्वामी समर्थ मठात देवदर्शनासाठी पायी निघाल्या होत्या.
सोलापूर-पुणे हायवेवरील ‘जय मल्हार हॉटेल’समोरून रस्ता क्रॉस करून पलीकडच्या लेनवर जात असतानाच, सोलापूर बाजूकडून पुणे बाजूकडे जाणाऱ्या एका अज्ञात दुचाकी चालकाने भरधाव वेगात गाडी चालवून रस्ता ओलांडणाऱ्या पुजा भिवसेन जाधव यांना जोरदार धडक दिली. दुचाकीची कडक धडक बसताच पुजा जाधव या रस्त्यावर कोसळल्या.
फिर्यादी निर्मला यांनी तात्काळ त्यांना उचलून रस्त्याच्या बाजूला घेतले आणि त्यांचे दीर भिवसेन जाधव यांना फोनवरून माहिती दिली. भिवसेन हे तात्काळ घटनास्थळी धावून आले. त्यांनी जखमी पुजा यांना तातडीने उपचारासाठी हरजीवन हॉस्पिटल, उरुळी कांचन येथे दाखल केले, जेथे त्यांच्यावर उपचार सुरू आहेत.अपघातानंतर झालेल्या चौकशीत धडक देणाऱ्या दुचाकी वाहनावरील चालकाचे नाव प्रतिक बाळासो भिसे असे असल्याची माहिती मिळाली.
दरम्यान, या अपघातात स्वतःच्याच अतिवेगामुळे नियंत्रण सुटल्याने चालक प्रतिक भिसे हा देखील रस्त्यावर पडल्याने गंभीर जखमी झाला असून, त्याच्या गाडीचेही मोठे कडक नुकसान झाले आहे. उरुळी कांचन पोलिसांनी प्रतिक भिसे याच्याविरुद्ध कारवाई केली आहे. तपास पोलीस हवालदार लोखंडे करत आहेत.
