पुणे: विकेंडला मित्र-परिवारासोबत पार्टीचा बेत आखत असाल, तर ही बातमी तुमच्यासाठी महत्त्वाची आहे. आषाढी एकादशीनिमित्त शनिवारी, २५ जुलै रोजी संपूर्ण महाराष्ट्रात ड्राय डे पाळण्यात येणार आहे. त्यामुळे राज्यभरातील मद्यविक्रीची दुकाने, बार, पब आणि मद्य परवाना असलेली आस्थापने दिवसभर बंद राहणार आहेत. त्यामुळे मद्य खरेदी किंवा पार्टीचे नियोजन करणाऱ्यांनी याची नोंद घ्यावी.
आषाढी एकादशी हा महाराष्ट्रातील अत्यंत महत्त्वाचा धार्मिक सण मानला जातो. या दिवशी लाखो वारकरी भगवान विठ्ठलाच्या दर्शनासाठी पंढरपूरमध्ये दाखल होतात. राज्यभरातील मंदिरांमध्ये भजन, कीर्तन, हरिपाठ, पूजा आणि विविध धार्मिक कार्यक्रमांचे आयोजन केले जाते. या पार्श्वभूमीवर धार्मिक वातावरण अबाधित राहावे आणि कायदा व सुव्यवस्था कायम ठेवण्यासाठी राज्य सरकारकडून ड्राय डे लागू करण्यात आला आहे.
हिंदू पंचांगानुसार, यंदा एकादशी तिथीची सुरुवात २४ जुलै रोजी सकाळी ९.१२ वाजता होणार असून तिची समाप्ती २५ जुलै रोजी सकाळी ११.३४ वाजता होईल. सूर्योदयाच्या वेळी एकादशी तिथी असल्यामुळे २५ जुलैलाच आषाढी एकादशी साजरी केली जाणार आहे. या दिवशी भाविक उपवास, पूजा-अर्चा आणि विविध धार्मिक विधी करतात.
आषाढी एकादशीला भगवान विठ्ठल आणि भगवान विष्णू यांच्या उपासनेला विशेष महत्त्व आहे. अनेक भाविक तुळशीची पाने अर्पण करतात, विष्णू सहस्रनाम, हरिपाठ आणि इतर धार्मिक ग्रंथांचे पठण करतात. याच दिवसापासून चातुर्मास या चार महिन्यांच्या पवित्र कालखंडाचीही सुरुवात होते. त्यामुळे राज्यभरात धार्मिक उत्साहाचे वातावरण असते.
दरम्यान, ड्राय डे असल्यामुळे मद्यविक्रीवर पूर्णपणे बंदी राहणार आहे. नियमांचे उल्लंघन करणाऱ्या आस्थापनांवर आणि बेकायदेशीर मद्यविक्री करणाऱ्यांवर संबंधित प्रशासनाकडून कारवाई केली जाऊ शकते. त्यामुळे नागरिकांनी नियमांचे पालन करून धार्मिक वातावरणाचा आदर करावा, असे आवाहन प्रशासनाकडून करण्यात आले आहे.
