पुणे: पुण्यातील दिवे घाट परिसरात दुर्मिळ वन्यजीवाची बेकायदेशीर विक्री करण्याच्या प्रयत्नाचा फुरसुंगी पोलिसांनी पर्दाफाश केला आहे. गुप्त माहितीच्या आधारे कारवाई करत पोलिसांनी दोन तरुणांना ताब्यात घेतले असून, त्यांच्या ताब्यातून एक मांडूळ जप्त करण्यात आला आहे. पुढील कारवाईसाठी हा साप वन विभागाच्या ताब्यात देण्यात आला आहे.
या प्रकरणात प्रथमेश सुरेश चव्हाण (वय १९, रा. जगतापनगर, सोनके, ता. कोरेगाव, जि. सातारा) आणि शिवराज अनिल भोईटे (वय २१, रा. भोईटे वस्ती, वाघोली, ता. कोरेगाव, जि. सातारा) या दोघांना अटक करण्यात आली आहे. याबाबत पोलीस अंमलदार प्रसाद अतुल कोरडे यांनी फुरसुंगी पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, फुरसुंगी पोलीस ठाण्याचे तपास पथक नियमित गस्तीवर असताना दिवे घाटाच्या पायथ्याजवळील वडकी नाला परिसरात दोन जण मांडूळ विक्रीसाठी येणार असल्याची गुप्त माहिती मिळाली. त्यानुसार पोलिसांनी २२ जुलै रोजी सायंकाळी साडेसातच्या सुमारास संबंधित ठिकाणी सापळा रचला.
तेथे संशयास्पदरीत्या उभ्या असलेल्या दोघांना ताब्यात घेऊन त्यांच्या सॅकची तपासणी करण्यात आली. झडतीदरम्यान बॅगेत एक जिवंत मांडूळ आढळून आला. हा साप तपकिरी रंगाचा असून अंदाजे ४५ इंच लांबीचा आणि सुमारे एक किलो वजनाचा असल्याची माहिती पोलिसांनी दिली. प्राथमिक अंदाजानुसार त्याची किंमत सुमारे एक लाख रुपये असल्याचे सांगण्यात आले आहे.
कारवाईनंतर पोलिसांनी जप्त केलेला मांडूळ वन विभागाच्या ताब्यात दिला असून त्याची सुरक्षित सुटका करण्यात येणार आहे. या प्रकरणी संबंधित कायद्यांनुसार पुढील कारवाई सुरू असून पोलीस उपनिरीक्षक शंभुराज जाधव अधिक तपास करत आहेत. वन्यजीवांची बेकायदेशीर खरेदी-विक्री आणि तस्करी रोखण्यासाठी अशा प्रकारच्या कारवाया पुढेही सुरू राहतील, असे पोलिसांनी स्पष्ट केले आहे.
