पुणे: पुणे जिल्ह्यातील शिरूर तालुक्यातील रांजणगाव गणपती येथे एका सराफा दुकानात चार महिलांनी खरेदीच्या बहाण्याने प्रवेश करून चांदीचे दागिने चोरल्याची धक्कादायक घटना घडली आहे. विशेष म्हणजे, महिलांनी इतक्या शिताफीने ही चोरी केली की त्या दुकानातून निघून गेल्यानंतरच दुकानदाराच्या हा प्रकार लक्षात आला. संपूर्ण घटना दुकानातील सीसीटीव्ही कॅमेऱ्यात कैद झाली असून, पोलिसांनी अज्ञात महिलांचा शोध सुरू केला आहे.
रांजणगाव गणपती येथील महावीर ज्वेलर्स या दुकानात २३ जुलै रोजी सायंकाळी साडेपाचच्या सुमारास चार महिला ग्राहक म्हणून आल्या. त्यांनी चांदीच्या जोडव्यांची मागणी करत विविध दागिने पाहण्यास सुरुवात केली. बराच वेळ दागिने पाहिल्यानंतर त्यांनी कोणतीही खरेदी न करता दुकानातून बाहेर पडल्या.
पोलिसांनी दिलेल्या माहितीनुसार, या महिलांच्या येण्यापूर्वी आणखी एक महिला दुकानात उपस्थित होती. दुकानातील गर्दी आणि दागिने पाहण्याच्या गडबडीत आरोपी महिलांनी हातचलाखी करत प्लास्टिकच्या पिशवीत ठेवलेले चांदीचे जोडवे लांबवल्याचा संशय आहे. महिलांच्या हालचालींमुळे त्या वेळी दुकानदाराला कोणताही संशय आला नव्हता.
काही वेळानंतर दुकानातील मालाची तपासणी करताना दुकानदार प्रणय वर्मा यांच्या लक्षात आले की, प्लास्टिकच्या पिशवीत ठेवलेले तब्बल ८२ चांदीचे जोडवे गायब आहेत. त्यानंतर त्यांनी दुकानातील सीसीटीव्ही फुटेज तपासले असता चोरीचा प्रकार उघडकीस आला. यानंतर त्यांनी रांजणगाव एमआयडीसी पोलीस ठाण्यात तक्रार दाखल केली.
तक्रारीनुसार पोलिसांनी चार अज्ञात महिलांविरुद्ध चोरीचा गुन्हा दाखल केला आहे. सीसीटीव्ही फुटेजच्या आधारे आरोपी महिलांची ओळख पटविण्याचे काम सुरू असून, त्यांचा शोध घेण्यासाठी पोलिसांनी तपासाची चक्रे वेगाने फिरवली आहेत. या घटनेमुळे परिसरातील सराफा व्यावसायिकांमध्ये चिंता व्यक्त होत असून, दुकानांमध्ये सुरक्षा व्यवस्था अधिक कडक करण्याची गरजही अधोरेखित झाली आहे.
