यवत, ता. 21 : घराबाहेर काढल्याच्या रागातून महिलेच्या (Yavat News) गळ्यावर आणि हातावर चाकूने वार करून तिला जिवे मारण्याचा प्रयत्न केल्याची घटना घडली आहे. गुरुवारी (ता. 19) रात्री आठ (Pune Crime) वाजण्याच्या सुमारास नांदुर ता. दौंड हद्दीत घडली आहे. याप्रकरणी यवत पोलीस ठाण्यात एकावर गुन्हा दाखल करण्यात आला आहे. (Latest Marathi News)
पिंकीदेवी प्रल्हादकुमार पासवान वय ४३ वर्षे व्यवसाय मजुरी रा. नांदुर ता. दौंड जि.पुणे, मुळ गाव गोमीया जि. बोकारो राज्य झारखंड) असे हल्ला झालेल्या महिलेचे नाव आहे. तर राकेशकुमार योगेंद्र पासवान रा. नांदुर ता. दौंड पुणे, मुळ गोमीया बोकारो, राज्य झारखंड) असे हल्ला करणाऱ्या आरोपीचे नाव आहे. याप्रकरणी पिंकीदेवी पासवान यांनी दिलेल्या तक्रारीवरून आरोपीवर खुनाचा प्रयत्नाचा गुन्हा दाखल केला आहे.
पोलिसांनी दिलेल्या माहितीनुसार, फिर्यादी पिंकीदेवी पासवान या नांदूर येथे मजुरी करून आपल्या कुटुंबासह राहतात. आरोपी राकेशकुमार पासवान हा देखील त्याच गावातील असून तो पिंकीदेवी यांच्यासोबत एकाच परिसरात राहत होता. काही दिवसांपूर्वी पिंकीदेवी यांनी आरोपीला रूममधून बाहेर काढले होते, ज्याचा राग त्याच्या मनात होता.
गुरुवारी (ता. 19) रात्री आठ वाजण्याच्या सुमारास, पिंकीदेवी या त्यांच्या राहत्या रूमच्या बाथरूमजवळ गेल्या होत्या. यावेळी आरोपी राकेशकुमारने तिथे येऊन त्यांना शिवीगाळ करण्यास सुरुवात केली. “तू मला घराबाहेर का काढले?” असे म्हणत त्याने जिवे मारण्याची धमकी दिली. वाद वाढत असतानाच आरोपीने स्वतःजवळील चाकू काढून पिंकीदेवी यांच्या गळ्यावर आणि हातावर सपासप वार केले.
दरम्यान, या हल्ल्यात पिंकीदेवी गंभीर जखमी झाल्या असून त्यांच्यावर उपचार सुरू आहेत. घटनेची माहिती मिळताच यवत पोलिसांनी तातडीने धाव घेतली. पिंकीदेवी यांनी दिलेल्या जबाबानुसार, आरोपी राकेशकुमार याच्याविरुद्ध भारतीय न्याय संहिता (BNS) कलम 109 (खुनाचा प्रयत्न), 352, 351 (2), (3) अंतर्गत गुन्हा दाखल करण्यात आला आहे. तपास पोलीस उप निरिक्षक अक्षय मोरे करीत आहेत.
