यवत, (पुणे) : “तू आमच्या घरासमोर विनाकारण फेऱ्या मारू नको,” असे सांगणाऱ्या एका 55 वर्षीय शेतकऱ्याला चौघांनी मिळून लाकडी दांडक्याने घरासमोर बेदम मारहाण केल्याची घटना घडली. भरतगाव (ता.दौंड) ग्रामपंचायत हद्दीत मंगळवारी (ता. 09) रात्री सात वाजण्याच्या सुमारास ही घटना घडली. याप्रकरणी भरतगाव येथील चौघांवर यवत पोलीस ठाण्यात गुन्हा दाखल करण्यात आला आहे.
शुभम माणिक डोंबाळे, दत्ता मल्हारी डोंबाळे, नवनाथ माणिक डोंबाळे (लाकडी दांडक्याने मारणारा), रामदास माणिक डोंबाळे (सर्व रा. भरतगाव, ता. दौंड, जि. पुणे) अशी मारहाण करणाऱ्या चौघांची नावे आहेत. तर कृष्णा शंकर डोंबाळे असे मारहाण झालेल्या शेतकऱ्याचे नाव आहे.
पोलिसांनी दिलेल्या माहितीनुसार, फिर्यादी कृष्णा डोंबाळे हे भरतगाव गावच्या हद्दीत आपल्या राहत्या घरासमोर सात वाजण्याच्या सुमारास हजर होते. यावेळी आरोपी शुभम डोंबाळे हा त्यांच्या घरासमोरून विनाकारण येण्या-जाण्याच्या फेऱ्या मारत होता. फिर्यादी कृष्णा यांनी त्याला हटकले आणि “तू आमच्या घरासमोर फेऱ्या मारू नको,” असे सांगितले. याच गोष्टीचा राग मनात धरून आरोपी शुभम याने फिर्यादींना शिवीगाळ करण्यास सुरुवात केली.
वाद वाढल्यानंतर शुभमच्या मदतीला त्याचे इतर साथीदारही तिथे धावून आले. आरोपी दत्ता डोंबाळे आणि रामदास डोंबाळे यांनी फिर्यादीच्या घरासमोर येऊन जोरदार आरडाओरडा करत शिवीगाळ केली आणि कृष्णा डोंबाळे यांना पकडून हाताने व लाथाबुक्क्यांनी बेदम मारहाण करण्यास सुरुवात केली.
दरम्यान, त्याच वेळी आरोपी नवनाथ डोंबाळे याने लाकडी दांडके आणून कृष्णा डोंबाळे यांच्या डाव्या पायाच्या गुडघ्यावर आणि मांडीवर कडक प्रहार केले. या हल्ल्यात कृष्णा यांच्या पायाला गंभीर दुखापत झाली. कृष्णा डोंबाळे यांनी दिलेल्या तक्रारीवरून यवत पोलिसांनी भरतगाव येथील खालील चार आरोपींवर गुन्हा दाखल केला आहे. तपास पोलीस उपनिरीक्षक थिकोळे करीत आहेत.
