सोलापूर: सोलापूरच्या बार्शी तालुक्यातील हत्तीज गावातून एक मन सुन्न करणारी बातमी समोर आली आहे. एका शाळेत मुख्याध्यापक म्हणून कार्यरत असलेल्या व्यक्तीने आपल्या पत्नी आणि दोन मुलांची हत्या करून स्वतःही आत्महत्या केल्याची धक्कादायक घटना उघडकीस आली आहे. या घटनेमुळे संपूर्ण बार्शी परिसरात तीव्र हळहळ व्यक्त केली जात आहे.
या दुर्दैवी घटनेत योगेश पाटील (मुख्याध्यापक), त्यांची पत्नी माधुरी आणि दोन मुले अथर्व व शिवांश यांचा मृत्यू झाला आहे. घटनास्थळाची पाहणी केल्यानंतर पोलिसांना एक २२ पानांची सुसाईड नोट सापडली आहे. या पत्रातून पाटील यांच्यावर असलेल्या आर्थिक तणावाचा आणि कर्जाच्या गंभीर परिस्थितीचा उलगडा त्यांनी केला आहे.
मिळालेल्या माहितीनुसार, योगेश पाटील यांनी शेअर बाजारात मोठी गुंतवणूक केली होती. मात्र, नशिबाची साथ न मिळाल्याने त्यांना या व्यवहारात खूप मोठे आर्थिक नुकसान सहन करावे लागले. त्यांच्यावर तब्बल 1.8 कोटी रुपयांचे कर्ज झाले होते. वाढत्या कर्जाचा डोंगर आणि त्यातून निर्माण झालेले नैराश्य यामुळे मुख्याध्यापकाने आपल्या संपूर्ण कुटुंबासह जीवन संपवण्याचा भीषण निर्णय घेतल्याचे प्राथमिक तपासात दिसून येत आहे. सध्या पोलीस या प्रकरणाचा कसून तपास करत आहेत.
