पुणे, ता. १२ : पुण्यातील खराडी परिसरात अल्पवयीन मुलीचा विवाह लावून दिल्याचा धक्कादायक प्रकार उघडकीस आला असून, चाइल्ड हेल्पलाइन १०९८ कडून मिळालेल्या माहितीच्या आधारे महिला व बाल विकास विभागाने केलेल्या चौकशीत संपूर्ण प्रकरणाचा पर्दाफाश झाला आहे. अवघ्या १४ वर्षे ५ महिने वयाच्या मुलीचा २७ वर्षीय तरुणासोबत विवाह झाल्याचे निष्पन्न झाल्यानंतर विवाहाला संमती देणाऱ्या आणि तो पार पाडण्यात सहभागी असलेल्या नऊ जणांविरुद्ध बालविवाह प्रतिबंधक कायद्यान्वये गुन्हा दाखल करण्यात आला आहे.
कृष्णा माधव कांबळे,सुरज गणपत कांबळे, शांताबाई गणपत कांबळे, अमोल गणपत कांबळे, योगेश काकासाहेब टैंकाळे, रुक्मीणी मारुती कांबळे, मोनिका नरसिंग कांबळे, नरसिंग मारुती कांबळे व संजना मारुती कांबळे अशी गुन्हा दाखल करण्यात आलेल्या आरोपींची नावे आहेत. याप्रकरणी मुख्य सेविका गायत्री पंडितराव सूर्यवंशी (वय २७) यांनी खराडी पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, फिर्यादी गायत्री सूर्यवंशी या बाल विकास प्रकल्प अधिकारी कार्यालय, पुणे शहर पूर्व येथे कार्यरत आहेत. त्या खराडी व चंदननगर परिसरातील ३१ अंगणवाड्यांच्या कामकाजाची जबाबदारी सांभाळतात. महिला व बाल विकास विभागाला चाइल्ड हेल्पलाइन १०९८ कडून एका अल्पवयीन मुलीच्या बालविवाहाची माहिती प्राप्त झाली होती. त्यानुसार ८ जून रोजी मुख्य सेविका, अंगणवाडी सेविका आणि चाइल्ड हेल्पलाइनच्या प्रतिनिधींनी संबंधित पत्त्यावर भेट दिली. मात्र, त्यावेळी मुलगी गावी गेल्याचे सांगण्यात आले.
त्यानंतर दुसऱ्या दिवशी पुन्हा पथकाने तपासणी केली असता संबंधित मुलगी गळ्यात मंगळसूत्र घातलेल्या अवस्थेत आढळून आली. चौकशीदरम्यान तिने स्वतःचे नाव करिष्मा (बदललेले नाव) असल्याचे सांगितले. मुलीसोबत असलेल्या कृष्णा माधव कांबळे (वय २७) याने दोघांनी खराडी गावातील बुद्ध विहार येथे विवाह केल्याचे सांगितले. पथकाने लग्नाबाबत विचारणा केली असता विवाहाचे छायाचित्रेही दाखविण्यात आली.
पुढील चौकशीत मुलीचे आई-वडील लातूर जिल्ह्यात राहत असल्याचे समोर आले. तसेच मुलीच्या जन्मदाखल्यावरील जन्मतारीख १ जानेवारी २०१२ असल्याची माहिती पालकांनी दिली. आधार कार्ड आणि इतर कागदपत्रांवरून मुलगी अल्पवयीन असल्याची खात्री करण्यात आली.
तपासात या विवाहासाठी काही नातेवाईक आणि कुटुंबीयांची संमती असल्याचे निष्पन्न झाले. विवाहासाठी स्थळ सुचविणे, विवाहाच्या वेळी उपस्थित राहणे आणि संमती देणे या आरोपांवरून एकूण नऊ जणांविरुद्ध खराडी पोलीस ठाण्यात बालविवाह प्रतिबंधक अधिनियम, २००६ मधील कलम ९, १० आणि ११ अन्वये गुन्हा दाखल केला असून पुढील तपास सुरू आहे.
