हडपसर, ता. १६ : सह्याद्री हॉस्पिटलमध्ये उपचार सुरू असलेल्या रुग्णाच्या प्रकृतीबाबत वाद घालत फुफ्फुसरोग तज्ज्ञ डॉक्टरला थप्पड मारून जखमी केल्याची धक्कादायक घटना घडली आहे. या मारहाणीत डॉक्टरांच्या चष्म्याची काच तुटली असून डोळ्यालाही दुखापत झाली आहे. याप्रकरणी हडपसर पोलिसांनी रुग्णाच्या मुलाविरुद्ध गुन्हा दाखल केला आहे.
रवीराज नामदेव झुरंगे (वय ३०, रा. एकतपूर, ता. पुरंदर) असे गुन्हा दाखल झालेल्या आरोपीचे नाव आहे. याप्रकरणी सह्याद्री हॉस्पिटलमधील फुफ्फुसरोग तज्ज्ञ तथा वैद्यकीय अधिकारी डॉ. नाना गोकुळ कुंजीर (वय ४२) यांनी हडपसर पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, नामदेव नारायण झुरंगे (वय ५४) यांना फुफ्फुसात पाणी साचल्याने ११ जून रोजी मध्यरात्री सह्याद्री हॉस्पिटलमध्ये उपचारासाठी दाखल करण्यात आले होते. डॉ. नाना कुंजीर यांच्या देखरेखीखाली त्यांच्यावर उपचार सुरू होते. १२ जून रोजी दुपारी फुफ्फुसाच्या बाहेरील आवरणातील पाणी काढण्याची प्रक्रिया यशस्वीरीत्या पार पाडण्यात आली. त्यानंतर रुग्णाची प्रकृती स्थिर असल्याने त्यांना अतिदक्षता विभागातून जनरल वॉर्डमध्ये हलविण्यात आले होते.
दरम्यान, सायंकाळी साडेपाचच्या सुमारास रुग्णाचा मुलगा रवीराज झुरंगे हा डॉक्टरांकडे आला. “माझ्या वडिलांवर योग्य उपचार झाले नाहीत,” असा आरोप करत त्याने डॉक्टरांशी वाद घालण्यास सुरुवात केली. डॉ. कुंजीर यांनी रुग्णाची प्रकृती स्थिर असून उपचार योग्य पद्धतीने सुरू असल्याचे समजावून सांगण्याचा प्रयत्न केला. मात्र, संतप्त झालेल्या रवीराज झुरंगे याने डॉक्टरांच्या कानशिलात जोरदार थप्पड मारली. या मारहाणीत डॉ. कुंजीर यांच्या चष्म्याची काच तुटली तसेच डाव्या डोळ्याला दुखापत होऊन त्यांना काही काळ अंधुक दिसू लागले. हॉस्पिटलमधील कर्मचाऱ्यांनी तातडीने हस्तक्षेप करून आरोपीला डॉक्टरांपासून दूर केले. त्यानंतर डॉक्टरांना प्राथमिक उपचार देण्यात आले.
या घटनेची माहिती मिळताच पोलिसांनी हॉस्पिटलमध्ये धाव घेत आरोपीला ताब्यात घेतले. याप्रकरणी रवीराज झुरंगे याच्याविरुद्ध महाराष्ट्र वैद्यकीय सेवा व्यक्ती आणि वैद्यकीय सेवा संस्था (हिंसक कृत्ये व मालमत्तेची हानी प्रतिबंध) अधिनियम २०१० च्या कलम ४ तसेच भारतीय न्याय संहिता कलम ११५(२) अन्वये गुन्हा दाखल करण्यात आला आहे. या प्रकरणाचा पुढील तपास हडपसर पोलीस ठाण्याचे पोलीस उपनिरीक्षक रत्नदीप बिराजदार करीत आहेत.
