विशाल शिंदे
राजगड: राजगड पोलीस ठाण्यात नुकतेच रुजू झालेले पोलीस निरीक्षक संतोष जाधव यांनी पदभार स्वीकारताच बेकायदेशीर धंद्यांविरोधात धडक कारवाईचा सपाटा लावला आहे. त्यांच्या मार्गदर्शनाखाली राजगड पोलिसांनी मधुशाला बार शेजारी सुरू असलेल्या कथित मटका अड्ड्यावर छापा टाकून सहा जणांवर कारवाई केली. या कारवाईमुळे नसरापूर परिसरातील अवैध धंदे करणाऱ्यांमध्ये एकच खळबळ उडाली असून, पोलिसांच्या या कारवाईचे नागरिकांकडून स्वागत केले जात आहे.
पोलीस पथकाला मिळालेल्या गोपनीय माहितीच्या आधारे सोमवारी रात्री मधुशाला बारच्या बाजूच्या मोकळ्या जागेवर छापा टाकण्यात आला. छाप्यावेळी काही व्यक्ती चिठ्ठ्यांवर आकडे घेऊन कथितपणे मटका जुगार चालवत असल्याचे आढळून आले. पोलिसांनी तात्काळ कारवाई करत संबंधितांना ताब्यात घेतले.
या कारवाईत गणेश रघुनाथ जाधव (वय ५२, रा. केळवडे), अनिल एकनाथ भिलारे (वय ५३, रा. नसरापूर), रमेश हरिशचंद्र नाईक (वय ४५, रा. सह्याद्री सिटी, नसरापूर), शिवलिंग मलया गुत्तेदार (वय ५०, रा. सुपरमार्केट शेजारी, नसरापूर), जावेद बादशाह मुलाणी (वय २७, रा. नसरापूर) आणि प्रदीप शंकर धुमाळ (वय ४२, रा. केळवडे) यांच्यावर कारवाई करण्यात आली.
छाप्यामध्ये रोख ४ हजार २३० रुपये, मटका व्यवहारासाठी वापरले जाणारे दोन पावती पुस्तके, कार्बन पेपर आणि बॉलपेन असा मुद्देमाल जप्त करण्यात आला. पोलिसांनी घटनास्थळी पंचनामा करून जप्त केलेले साहित्य ताब्यात घेतले असून संबंधितांविरुद्ध पुढील कायदेशीर प्रक्रिया सुरू करण्यात आली आहे.
पोलीस निरीक्षक संतोष जाधव यांनी नुकताच राजगड पोलीस ठाण्याचा पदभार स्वीकारला असून, रुजू झाल्यानंतर अवैध धंद्यांवर कठोर कारवाई करण्याचा स्पष्ट संदेश दिला आहे. त्यांच्या नेतृत्वाखाली अल्पावधीत झालेल्या या कारवाईची संपूर्ण भोर तालुक्यात चर्चा सुरू झाली आहे. मटका, जुगार, गुटखा, हातभट्टी दारू आणि इतर बेकायदेशीर व्यवसायांवरही अशाच पद्धतीने सातत्याने कारवाई व्हावी, अशी अपेक्षा नागरिकांकडून व्यक्त केली जात आहे.
राजगड पोलीस ठाण्याच्या पथकाने केलेल्या या कारवाईमुळे बेकायदेशीर धंदे चालविणाऱ्यांचे धाबे दणाणले असून, पुढील काळात अशा कारवाया आणखी तीव्र होण्याची शक्यता व्यक्त केली जात आहे. या प्रकरणाचा पुढील तपास राजगड पोलीस करीत आहेत.
