पुणे: सोशल मीडियावर झालेली मैत्री एका शिक्षिकेसाठी मोठी फसवणूक ठरली. मैत्रिणीला भेटण्यासाठी तिच्या घरी आलेल्या तरुणाने संधी साधत रोख रक्कम आणि सोन्याचे दागिने असा तब्बल १४ लाख ६३ हजार ४९६ रुपयांचा ऐवज चोरून पलायन केले. मात्र, कोंढवा पोलिसांनी तांत्रिक तपासाच्या आधारे गुजरातमधील वडोदरा येथून आरोपीला अटक करत चोरीतील बहुतांश मुद्देमाल जप्त केला.
अटक करण्यात आलेल्या आरोपीचे नाव यश कैलास भुलचंदानी (वय २४, रा. मोहाडी, जि. म्हैसाणा, गुजरात) असे आहे. पोलिसांनी त्याच्याकडून सुमारे १४ लाख ३९ हजार रुपये किमतीचे १६ तोळे सोन्याचे दागिने जप्त केले आहेत.
पोलिसांनी दिलेल्या माहितीनुसार, फिर्यादी तरुणी पुण्यात शिक्षिका असून अविवाहित आहे. सुमारे दीड ते दोन वर्षांपूर्वी तिची सोशल मीडियाच्या माध्यमातून यशशी ओळख झाली होती. एमबीए शिक्षण घेतलेल्या यशने यापूर्वी केनियामध्ये नोकरी केली होती. काही दिवसांपूर्वी तो पुण्यात आला होता आणि एका टुरिस्ट कंपनीत काम करत होता.
२५ जून रोजी यश हा शिक्षिकेला भेटण्यासाठी कोंढवा खुर्द येथील तिच्या घरी गेला होता. त्यावेळी शिक्षिका जवळच राहणाऱ्या आपल्या मावशीकडे जेवणाचा डबा देण्यासाठी गेली होती. घरात कोणी नसल्याची संधी साधून आरोपीने बेडरूममधील कपाटातून २४ हजार रुपयांची रोकड आणि सोन्याचे दागिने चोरले. घरातून निघताना “माझी तब्येत ठीक नाही, त्यामुळे मी निघतो,” असे सांगून त्याने तेथून काढता पाय घेतला.
घरी परतल्यानंतर चोरी झाल्याचे लक्षात येताच शिक्षिकेने कोंढवा पोलीस ठाण्यात तक्रार दाखल केली. तपासादरम्यान आरोपी शिक्षिकेशी केवळ स्नॅपचॅटद्वारे संपर्कात असल्याचे समोर आले. त्याचा मोबाईल क्रमांकही उपलब्ध नव्हता. अशा परिस्थितीत पोलिसांनी तांत्रिक विश्लेषणाच्या मदतीने आरोपीचा माग काढला. तपासादरम्यान पोलीस कर्मचारी केशव हिरवे यांना आरोपी वडोदरा येथे असल्याची माहिती मिळाली.
कोंढवा पोलिसांच्या पथकाने चार दिवस आरोपीवर पाळत ठेवली. पासपोर्टसंबंधी कामासाठी तो वडोदरा येथे आला असताना त्याला ताब्यात घेण्यात आले. चौकशीदरम्यान त्याने चोरीची कबुली दिली. या कारवाईत पोलिसांनी चोरीतील बहुतांश सोन्याचे दागिने जप्त केले असून, प्रकरणाचा पुढील तपास सुरू आहे.
