राहुलकुमार अवचट
यवत, (पुणे) : केडगाव येथील लालचंदनगर सोसायटी परिसरात गुरुवारी रात्री जुन्या भांडणाच्या रागातून एका 20 वर्षीय तरुणावर जीवघेणा हल्ला करण्यात आला आहे. भररस्त्यात कोयता, लोखंडी रॉड आणि लाकडी हॉकी स्टिकने वार करून तरुणाला जिवे मारण्याचा प्रयत्न झाला. याप्रकरणी तिघांवर यवत पोलीस ठाण्यात गुन्हा दाखल करण्यात आला असून अवघ्या 24 तासांच्या आत मुख्य आरोपीला अटक करण्यात आली.
प्रभुद्ध उर्फ विशाल नितीन अवधुते वय 20 वर्षे व्यवसाय शिक्षण रा. पिसेवस्ती केडगाव ता. दौंड जि.पुणे) असे मारहाण झालेल्या तरुणाचे नाव आहे. तर अजय अनिल भोसले, सुजल अनिल भोसले (दोघे रा वाळेकर कासेस जवळ, केडगाव ता. दौंड जि.पुणे) व अर्जुन आसवरे (पुर्ण नाव पत्ता माहित नाही) अशी मारहाण करणाऱ्या तिघांची नावे आहेत. यातील मुख्य आरोपी अजय अनिल भोसले याला अटक करण्यात आली आहे.
पोलिसांनी दिलेल्या माहितीनुसार, प्रबुद्ध उर्फ विशाल अवधुते हा तरुण गुरुवारी (ता. 11) रात्री साडेसात वाजण्याच्या सुमारास हा त्याच्या मोटारसायकलवरून केडगाव गावच्या हद्दीतील लालचंदनगर सोसायटीसमोरील ‘ताज पान शॉप’वर पान घेण्यासाठी थांबला होता. त्याच वेळी, जुन्या भांडणाचा राग मनात धरून आरोपींनी प्रबुद्धला एकटे पाहून त्याला घेरले. व शिवीगाळ करत दमदाटी सुरू केली.
वाद वाढत असतानाच आरोपींनी त्यांच्याकडे असलेली लाकडी हॉकी स्टिक, लोखंडी रॉड आणि धारदार कोयत्याने थेट हल्ला चढवला. डोक्यात आणि शरीरावर गंभीर वार करून त्याला जिवे मारण्याचा प्रयत्न करण्यात आला. या हल्ल्यात प्रबुद्ध रक्ताच्या थारोळ्यात कोसळल्यानंतर आरोपींनी तिथून पळ काढला. जखमी तरुणाने तात्काळ यवत पोलीस ठाणे गाठून फिर्याद दिली. याप्रकरणी तिघांवर गुन्हा दाखल करण्यात आला होता.
दरम्यान, गुन्हा दाखल होताच यवत पोलिसांनी मुख्य आरोपी अजय भोसले याला अटक केली. त्याला प्रथमवर्ग न्यायदंडाधिकारी (दौंड न्यायालय) यांच्यासमोर हजर केले असता, त्याला 17 जूनपर्यंत पोलीस कस्टडी रिमांड मंजूर केली आहे. सदर गुन्ह्याचा पुढील तपास पोलीस उपनिरीक्षक बाळकृष्ण गाडेकर करत आहेत.
