पुणे : आषाढी एकादशी अवघ्या काही दिवसांवर आली असून वारकऱ्यांची वारी सुखकर व्हावी यासाठी राज्य सरकार पूर्णपणे ॲक्शन मोडमध्ये आले आहे. उपमुख्यमंत्री एकनाथ शिंदे यांनी यासंदर्भात सर्व संबंधित मंत्र्यांना तातडीने कामाला लागण्याचे आदेश दिले आहेत. वारी दरम्यान भाविकांना कोणत्याही प्रकारचा त्रास होणार नाही, याची काळजी घेण्याच्या सूचना त्यांनी दिल्या आहेत.
याच पार्श्वभूमीवर आज पंढरपूर येथे एका महत्त्वाच्या बैठकीचे आयोजन करण्यात आले आहे. या बैठकीत पालखी मार्गावरील आरोग्य सुविधा आणि विठ्ठल मंदिरातील व्यवस्थांचा सविस्तर आढावा घेतला जाणार आहे. आरोग्य मंत्री प्रकाश आबिटकर आज स्वतः पंढरपूर दौऱ्यावर असून ते या बैठकीला उपस्थित राहणार आहेत. तसेच या बैठकीनंतर मंत्री महोदय विठ्ठलाचे दर्शनही घेणार आहेत.
दुसरीकडे राज्यातील राजकीय वातावरण कमालीचे तापले आहे. उपमुख्यमंत्री एकनाथ शिंदे यांच्याकडून ‘ऑपरेशन टायगर’ राबवले जात असल्याची जोरदार चर्चा आहे. या मोहिमेअंतर्गत त्यांनी ठाकरे गटाला एकामागून एक मोठे धक्के देण्यास सुरुवात केली आहे.नुकतेच ठाकरे गटाचे ६ खासदार शिंदे गटात सामील झाले आहेत. एवढेच नव्हे तर आदित्य ठाकरे यांचे निकटवर्तीय मानले जाणारे नेते सचिन अहिर यांना थेट विधान परिषदेचे उपसभापती पद देण्यात आले आहे.
दरम्यान काल रात्री उशिरा ठाण्यात मोठा पक्षप्रवेश सोहळा पार पडला. अजूनही काही आमदार आणि मोठे नेते शिंदे गटाच्या संपर्कात असल्याचे बोलले जात असून, येत्या काळात ठाकरे गटात पुन्हा एकदा मोठी फूट पडण्याची शक्यता वर्तवली जात आहे.
