सांगली : सांगली जिल्ह्यातील आटपाडी तालुक्यातील शेटफळे गावात एक अत्यंत धक्कादायक घटना घडली आहे. घरात एकट्या राहणाऱ्या वृद्ध महिलेवर अज्ञात व्यक्तीने हल्ला करून त्यांच्या अंगावरील दागिने लुटल्याचा आरोप आहे. त्यानंतर त्यांना जिवंत पेटवून दिल्याची घटना समोर आली असून, उपचारादरम्यान त्यांचा मृत्यू झाला. या घटनेमुळे परिसरात हळहळ व्यक्त होत असून, पोलिसांनी अज्ञात आरोपीविरुद्ध गुन्हा दाखल करून तपास सुरू केला आहे.
या घटनेत मृत्यू झालेल्या महिलेचे नाव मालन मारुती जाधव असे आहे. त्यांच्या मुलगा विठ्ठल मारुती जाधव यांनी आटपाडी पोलीस ठाण्यात फिर्याद दाखल केली आहे.
पोलिसांनी दिलेल्या प्राथमिक माहितीनुसार, मालन जाधव या शेटफळे गावात एकट्याच राहत होत्या. ३० जून रोजी पहाटे त्या लघुशंकेसाठी घराबाहेर गेल्या होत्या. त्या परत घरात येत असताना अज्ञात व्यक्ती त्यांच्या मागोमाग घरात शिरल्याचा संशय आहे.
घरात प्रवेश केल्यानंतर आरोपीने मालन जाधव यांच्यावर हल्ला करून त्यांच्या अंगावरील सोन्याचे दागिने हिसकावून घेतल्याचे पोलिसांनी सांगितले. त्यानंतर पुरावा नष्ट करण्याच्या उद्देशाने आरोपीने त्यांच्या अंगावर ज्वलनशील पदार्थ टाकून आग लावल्याचा आरोप आहे. घटना घडल्यानंतर आरोपी तेथून पसार झाला.
आगीमुळे गंभीर भाजलेल्या मालन जाधव यांचा आरडाओरडा ऐकून परिसरातील नागरिक घटनास्थळी धावले. त्यानंतर त्यांना तातडीने सांगली येथील शासकीय रुग्णालयात दाखल करण्यात आले. मात्र, उपचार सुरू असताना त्यांची प्रकृती खालावत गेली आणि अखेर त्यांचा मृत्यू झाला.
या प्रकरणामुळे शेटफळे गावासह परिसरात संतापाचे वातावरण निर्माण झाले आहे. पोलिसांनी अज्ञात आरोपीचा शोध सुरू केला असून, विविध अंगांनी तपास केला जात आहे. आरोपीला लवकरात लवकर अटक करण्यासाठी विशेष पथकेही काम करत असल्याची माहिती पोलिसांनी दिली आहे.
