पुणे : उकाड्याने हैराण झालेल्या आणि हिवाळ्यातील गुलाबी थंडीची वाट पाहणाऱ्या नागरिकांसाठी हवामान खात्याकडून चिंतेची बातमी समोर आली आहे. यंदा एल निनोच्या तीव्र प्रभावामुळे भारतात थंडीचा जोर अत्यंत कमी असणार आहे. त्यामुळे उन्हाचा चटका आणि अंगाची लाहीलाही करणारा उकाडा आणखी काही काळ असाच कायम राहण्याची शक्यता वर्तवण्यात आली आहे.
हवामान तज्ज्ञ यांनी दिलेल्या माहितीनुसार, ऑक्टोबर आणि नोव्हेंबर महिन्याचे पहिले दोन आठवडे महाराष्ट्रात अतिउष्ण आणि कोरड्या हवामानाचे राहतील. हा एल निनोचा प्रभाव फेब्रुवारी 2027 पर्यंत टिकण्याची शक्यता असल्याने यंदाचा हिवाळा अत्यंत सौम्य आणि उबदार असणार आहे.
सध्या बंगालच्या उपसागरात चक्रीवादळाची स्थिती निर्माण झाली असून, त्याचा मोठा फटका आंध्र प्रदेश आणि तामिळनाडूला बसू शकतो. तसेच अरबी समुद्रात कमी दाबाचा पट्टा तयार झाला आहे. यामुळे स्थानिक पातळीवर हवामानात काही बदल दिसतील, परंतु भारताला थेट चक्रीवादळाचा मोठा धोका नाही.
महाराष्ट्रातील बहुतेक भागांमध्ये हवामान अतिउष्ण असणार आहे. मराठवाड्यात छत्रपती संभाजीनगर येथे ऑक्टोबरमध्ये हलक्या ते मध्यम स्वरूपाच्या पावसाचा अंदाज आहे. कोकणातील रायगड, रत्नागिरी आणि सिंधुदुर्ग या जिल्ह्यांमध्ये तसेच घाटमाथ्यावर पावसाच्या हलक्या सरी कोसळू शकतात. यामुळे काही काळ स्थानिक वातावरणात किंचित दिलासा मिळण्याची शक्यता आहे.
