पुणे : कराडजवळ पुणे-बंगळुरू महामार्गावरील नवनिर्मित सहापदरी उड्डाणपुलावर एका भीषण रस्ता अपघातात चार तरुणांचा दुर्दैवी मृत्यू झाला असून तीनजण गंभीर जखमी झाले आहेत. कोल्हापूर येथील श्री महालक्ष्मीचे दर्शन घेऊन स्कॉर्पिओ गाडीने आपल्या गावी परतताना हा काळाचा घाला आला.
मिळालेल्या माहितीनुसार, सातारा जिल्ह्यातील खटाव तालुक्यातील कातरखटाव येथील काही तरुण दसऱ्यानिमित्त कोल्हापूरला दर्शनासाठी गेले होते. दर्शन आटोपून रात्री परत येत असताना, रात्री 11 वाजेच्या सुमारास कराड शहराजवळ त्यांच्या गाडीने समोर चाललेल्या ट्रकला पाठीमागून जोरदार धडक दिली. धडक एवढी तीव्र होती की स्कॉर्पिओचा पूर्णपणे चुराडा झाला.
या दुर्घटनेत तेजस देशमुख (वय 25, चालक), सागर निंबाळकर (वय 23), सुयश चिंचकर (वय 20) आणि रोहित धोत्रे (वय 21) या चार मित्रांचा जागीच मृत्यू झाला. तर ऋतुराज दुबळे (वय 21), शंतनू शिंगाडे (वय 20) आणि अमन तांबोळी (वय 23) हे तिघे गंभीर जखमी झाले असून त्यांच्यावर कराड येथील कृष्णा रुग्णालयात उपचार सुरू आहेत. नव्याने सुरू झालेल्या या उड्डाणपुलावरील हा पहिलाच मोठा अपघात आहे.
घटनेची माहिती मिळताच कराडच्या डीवायएसपी राजश्री पाटील, वरिष्ठ पोलीस निरीक्षक दत्तात्रय दराडे, वाहतूक शाखेचे अधिकारी आणि स्थानिक नागरिकांनी तातडीने मदतीसाठी घटनास्थळी धाव घेतली. जखमींना त्वरित रुग्णालयात दाखल करण्यात आले आणि महामार्गावरील खोळंबलेली वाहतूक सुरळीत करण्यात आली. पोलीस या प्रकरणी पुढील कायदेशीर तपास करत आहेत. या घटनेमुळे कातरखटाव गावावर आणि मृतांच्या कुटुंबांवर दुःखाचा डोंगर कोसळला आहे.
