अकोले : अकोले तालुक्यातील गुणवत्तापूर्ण शिक्षणासाठी ओळखल्या जाणाऱ्या ज्ञानवर्धिनी बालक मंदिर आणि मॉडर्न हायस्कूलमध्ये नव्या पदाधिकाऱ्यांची निवड करण्यात आली आहे. ज्ञानवर्धिनी बालक मंदिरच्या चेअरमनपदी ज्येष्ठ पत्रकार अमोल वैद्य, मॉडर्न हायस्कूलच्या चेअरमनपदी सामाजिक कार्यकर्त्या प्रतिमा कुलकर्णी, तर हिंद सेवा मंडळ संचलित अकोले विभागाच्या प्रशासकीय अधिकारीपदी सेवानिवृत्त प्राचार्य संतोष कचरे यांची निवड करण्यात आली आहे.
अमोल वैद्य यांनी एम.ए., बी.एड. तसेच पत्रकारितेचे शिक्षण घेतले असून ते सध्या अखिल भारतीय मराठी पत्रकार परिषदेचे जिल्हाध्यक्ष म्हणून कार्यरत आहेत. याशिवाय त्यांनी सुगाव खुर्दचे माजी सरपंच, महात्मा गांधी तंटामुक्त समितीचे अध्यक्ष, रोटरी क्लब अकोलेचे संस्थापक आणि रोटरी इंटरनॅशनल डिस्ट्रिक्ट ३१३२ चे माजी असिस्टंट गव्हर्नर म्हणून विविध सामाजिक, शैक्षणिक आणि विकासात्मक उपक्रमांमध्ये उल्लेखनीय योगदान दिले आहे. त्यांच्या अनुभवाची दखल घेत त्यांच्यावर चेअरमनपदाची जबाबदारी सोपविण्यात आली आहे.
प्रशासकीय अधिकारीपदी निवड झालेले संतोष कचरे हे सेवानिवृत्त प्राचार्य असून ते जनजाती कल्याण समितीचे जिल्हाध्यक्ष आहेत. त्यांनी मॉडर्न हायस्कूल व ज्युनिअर कॉलेजचे प्राचार्य म्हणून काम केले आहे. आदिवासी विद्यार्थ्यांना दर्जेदार शिक्षण आणि चांगल्या सुविधा मिळाव्यात यासाठी त्यांनी सातत्याने प्रयत्न केले आहेत.
प्रतिमा कुलकर्णी यांनी एम.ए., बी.एड. शिक्षण पूर्ण केले असून त्यांनी शिक्षक म्हणून काम केले आहे. त्यांनी अनेक वर्षे प्रयोगशील ‘बाल आनंदवाडी’ चालवली असून सध्या एकल महिलांचे प्रश्न आणि त्यांच्या मुलांच्या शिक्षणासाठी सामाजिक कार्य करत आहेत. विविध सामाजिक उपक्रमांमधील त्यांच्या योगदानाची दखल घेत त्यांची मॉडर्न हायस्कूलच्या चेअरमनपदी निवड करण्यात आली आहे.
या तिन्ही मान्यवरांच्या निवडीबद्दल हिंद सेवा मंडळाचे मानद सचिव संजय जोशी, कार्याध्यक्ष सुमतीलाल कोठारी, संचालक दिलीपकुमार शहा, सचिव सहाय्यक योगेश देशमुख, मॉडर्न ज्युनिअर कॉलेजचे चेअरमन तथा नगराध्यक्ष बाळासाहेब वडजे, मंडळाचे पदाधिकारी, स्थानिक शाळा समितीचे सदस्य, पालक आणि विविध क्षेत्रातील नागरिकांनी त्यांचे अभिनंदन केले आहे.
