पुणे : पुणे शहराची ओळख आणि लाखो भाविकांचे श्रद्धास्थान असलेल्या मानाच्या पाचही गणपतींचे विसर्जन शुक्रवारी (ता. २५) शिस्तबद्ध आणि उत्साहपूर्ण वातावरणात पार पडले. सकाळी ९.४५ वाजता मानाचा पहिला गणपती श्री कसबा गणपतीच्या मिरवणुकीला मंडईतून सुरुवात झाली. त्यानंतर सायंकाळी ६.१० वाजता मानाच्या पाचव्या गणपतीचे विसर्जन पूर्ण झाले.
मानाच्या पाचही गणपतींच्या विसर्जनाची सुरुवात श्री कसबा गणपतीच्या मिरवणुकीने झाली. कसबा गणपतीची मिरवणूक सकाळी ९.४५ वाजता सुरू झाली. सकाळी १०.२८ वाजता गणपती बेलबाग चौकात पोहोचला आणि सायंकाळी ४.४० वाजता विसर्जन झाले. या मिरवणुकीला एकूण ६ तास ५५ मिनिटे लागली.
मानाचा दुसरा श्री तांबडी जोगेश्वरी गणपतीची मिरवणूक सकाळी १० वाजता सुरू झाली. सकाळी ११.२५ वाजता बेलबाग चौकात आगमन झाले आणि सायंकाळी ५ वाजता विसर्जन झाले. मिरवणुकीला ७ तास १५ मिनिटे लागली.
मानाचा तिसरा श्री गुरुजी तालीम गणपतीची मिरवणूक सकाळी १०.१५ वाजता सुरू झाली. सकाळी ११.२७ वाजता बेलबाग चौकात आगमन झाले आणि सायंकाळी ५.०५ वाजता विसर्जन करण्यात आले. या मिरवणुकीला ७ तास २० मिनिटे लागले.
मानाचा चौथा श्री तुळशीबाग गणपतीची मिरवणूक सकाळी १०.४५ वाजता सुरू झाली. दुपारी १.५४ वाजता बेलबाग चौकात आगमन झाले आणि सायंकाळी ५.३४ वाजता विसर्जन झाले.
मानाचा पाचवा श्री केसरीवाडा गणपतीची मिरवणूक सकाळी ११.१० वाजता सुरू झाली. दुपारी ३ वाजता बेलबाग चौकात आगमन झाले आणि सायंकाळी ६.१० वाजता विसर्जन पूर्ण झाले.
विसर्जन मिरवणुकीदरम्यान पारंपरिक ढोल-ताशा पथकांचा गजर, ध्वजधारकांचे प्रात्यक्षिक आणि गुलालाची उधळण पाहायला मिळाली. भक्तिमय आणि उत्साहपूर्ण वातावरणात भाविकांनी लाडक्या गणरायाला निरोप दिला. मानाच्या गणपतींच्या विसर्जन मिरवणुका वेळेत आणि सुरळीत पार पडल्याने प्रशासन आणि नागरिकांनी समाधान व्यक्त केले. आता पुण्यातील इतर प्रमुख आणि सार्वजनिक गणेश मंडळांच्या विसर्जन मिरवणुका मुख्य रस्त्यांवरून सुरू आहेत.
