हडपसर, ता. २५ : हडपसर येथील वॉव स्टे लॉजमधील एका खोलीत २२ वर्षीय तरुणीने आत्महत्या केल्याची धक्कादायक घटना घडली असून गुरुवारी (दि. २४) सकाळी उघडकीस आली आहे. तरुणीला आत्महत्येस प्रवृत्त केल्याच्या आरोपावरून हडपसर पोलिसांनी एका वकिलाला अटक केली आहे.
साक्षी संतोष गायकवाड (वय २२) असे मृत तरुणीचे नाव आहे. तर विश्वास वामनराव जगताप (देशमुख) (वय २३, रा. सासवड, ता. पुरंदर, जि. पुणे) असे अटक करण्यात आलेल्या आरोपी वकिलाचे नाव आहे.
पोलिसांनी दिलेल्या माहितीनुसार, साक्षी ही पुण्यातील मॉडर्न कॉलेजमध्ये एलएल. बी. च्या अंतिम वर्षात शिक्षण घेत होती. सन २०२२ मध्ये साक्षी ही कायद्याच्या प्रवेश परीक्षेच्या (सीईटी) क्लाससाठी हिवरे येथून डेक्कनला ये-जा करीत होती. त्यावेळी सासवड येथील विश्वास जगताप हा साक्षीला त्रास देत असल्याचे तिने वडिलांना सांगितल्याचा दावा फिर्यादीत करण्यात आला आहे. त्यानंतर साक्षीच्या वडिलांनी विश्वास आणि त्याच्या चुलत्याला घरी बोलावून समज दिली होती. भविष्यात साक्षीला त्रास देणार नाही, असे विश्वासने सांगितल्याचा दावा फिर्यादीत करण्यात आला आहे.
दरम्यान, २४ सप्टेंबर रोजी पहाटे साडेपाचच्या सुमारास विश्वास हा साक्षीला हडपसर येथील वॉव स्टे लॉजमधील खोलीत घेऊन गेला, अशी माहिती तिच्या वडिलांनी पोलिसांना दिली. खोलीत दोघांमध्ये वाद झाल्यानंतर साक्षीने आत्महत्या केल्याचा आरोप तक्रारीत करण्यात आला आहे.
या घटनेनंतर विश्वासने साक्षीला ससून रुग्णालयात दाखल केले. मात्र, डॉक्टरांनी तपासल्यानंतर तिला मृत घोषित केले. याची माहिती मिळाल्यानंतर साक्षीचे वडील संतोष गायकवाड यांनी हडपसर पोलिस ठाण्यात तक्रार दाखल केली. तक्रारीनंतर पोलिसांनी तातडीने गुन्हा दाखल करून विश्वास जगताप याच्यावर भारतीय न्याय संहिता २०२३ मधील कलम १०८ अन्वये गुन्हा दाखल करून अटक केली आहे. या प्रकरणाचा पुढील तपास पोलीस उपनिरीक्षक रत्नदिप बिराजदार करीत आहेत.
हडपसर पोलिस ठाण्याचे वरिष्ठ पोलीस निरीक्षक हेमंत पाटील, पोलीस निरीक्षक निलेश जगदाळे, सहायक पोलीस निरीक्षक अर्चना गाढवे, पोलीस उपनिरीक्षक शुभम शिंदे यांच्यासह पोलिस अधिकाऱ्यांनी घटनास्थळी भेट देऊन तपासाची कार्यवाही केली.
साक्षीच्या मृत्यूमागील नेमकी परिस्थिती, लॉजमधील घटनाक्रम आणि दोघांमधील वादाचे कारण याबाबत पोलिसांकडून तपास सुरू आहे. आरोपीवरील आरोप हे फिर्यादीत नमूद केलेल्या माहितीनुसार असून, त्यांची सत्यता तपासातून स्पष्ट होणार आहे.
