मुंबई : महाराष्ट्र लोकसेवा आयोगामार्फत (MPSC) घेण्यात येणाऱ्या परीक्षांमधील पेपरफुटी आणि इतर गैरप्रकारांच्या आरोपांची चौकशी करण्यासाठी राज्य सरकारने महत्त्वाचा निर्णय घेतला आहे. या प्रकरणांच्या चौकशीसाठी निवृत्त न्यायमूर्तींच्या अध्यक्षतेखाली आयोग स्थापन करण्यासंदर्भात अधिसूचना जारी करण्यात आली आहे. निवृत्त न्यायमूर्ती दिलीप भोसले हे या चौकशी आयोगाचे अध्यक्ष असणार आहेत. आयोगाला अधिसूचना जारी झाल्यापासून दोन महिन्यांत अहवाल सादर करण्याचे निर्देश देण्यात आले आहेत.
औषध निरीक्षक, गट-ब, गट-क, कृषी सेवा आणि अभियांत्रिकी सेवांसह एकूण नऊ परीक्षांमधील कथित गैरप्रकारांची चौकशी केली जाणार आहे. प्रश्नपत्रिका, उत्तरतालिका किंवा त्यातील काही भाग फुटल्याच्या आरोपांचा तपास आयोगाकडून करण्यात येईल.
या प्रकरणांमध्ये महाराष्ट्र लोकसेवा आयोगाचे विद्यमान आणि माजी अध्यक्ष तसेच सदस्य यांच्या भूमिकेचीही तपासणी केली जाणार आहे. याशिवाय पेपरफुटीशी संबंधित अधिकारी, कर्मचारी आणि इतर व्यक्तींच्या भूमिकेची चौकशी होईल. दोष सिद्ध झाल्यास संविधानाच्या कलम ३१७ अंतर्गत कारवाई करण्याबाबत शिफारस करण्याची जबाबदारीही आयोगावर सोपवण्यात आली आहे.
निवृत्त न्यायमूर्ती दिलीप भोसले यांच्या अध्यक्षतेखाली स्थापन करण्यात आलेल्या आयोगात निवृत्त न्यायमूर्ती पी. डी. नाईक यांच्यासह पाच सदस्यांचा समावेश करण्यात आला आहे. आयुक्त तुकाराम मुंढे, गणेश पाटील आणि लखामी गौतम यांचाही आयोगात समावेश असल्याचे अधिसूचनेत नमूद करण्यात आले आहे.
या आयोगाच्या माध्यमातून परीक्षांमधील कथित गैरप्रकारांची सखोल चौकशी करून जबाबदारी निश्चित करण्याचा प्रयत्न केला जाणार आहे. आयोगाच्या अहवालानंतर पुढील कारवाईबाबत निर्णय घेतला जाण्याची शक्यता आहे.
MPSC परीक्षांमधील पेपरफुटीच्या आरोपांमुळे विद्यार्थ्यांमध्ये नाराजी निर्माण झाली होती. औषध निरीक्षक पदाच्या परीक्षेचा पेपर फुटल्याचे प्रकरण समोर आल्यानंतर विद्यार्थ्यांनी आयोगाचे अध्यक्ष विवेक भीमनवार यांच्या राजीनाम्याची मागणी केली होती. या मागणीसाठी पुण्यात विद्यार्थ्यांनी सुमारे दहा दिवस आंदोलन केले.
विद्यार्थ्यांशी चर्चा करण्यासाठी राज्य सरकारच्या वतीने मंत्री शिवेंद्रराजे भोसले यांनी पुढाकार घेतला होता. चौकशी आयोग स्थापन करण्याचे आश्वासन मिळाल्यानंतर आणि विवेक भीमनवार यांनी रजेवर जाण्याचा निर्णय घेतल्यानंतर विद्यार्थ्यांनी आंदोलन मागे घेतले होते.
विवेक भीमनवार रजेवर असल्याने महाराष्ट्र लोकसेवा आयोगाचे सदस्य सतीश बबन वाघोले यांच्याकडे अध्यक्षपदाचा अतिरिक्त कार्यभार सोपवण्यात आला आहे. राज्यपाल जिष्णू देव वर्मा यांच्या वतीने यासंदर्भातील आदेश जारी करण्यात आले आहेत.
दरम्यान, औषध निरीक्षक पदाच्या परीक्षेचा पेपर फुटल्याच्या प्रकरणात आयोगातील काही अधिकाऱ्यांना अटक झाल्याची माहिती समोर आली होती. या प्रकरणामुळे MPSC परीक्षांच्या पारदर्शकतेबाबत प्रश्न उपस्थित झाले आहेत. आता नव्याने स्थापन करण्यात आलेल्या चौकशी आयोगाच्या अहवालाकडे विद्यार्थी आणि परीक्षा देणाऱ्या उमेदवारांचे लक्ष लागले आहे.
