अक्षय टेमगिरे
रांजणगाव गणपती : शिरूर तालुक्यातील पिंपरी दुमाला येथे गेल्या सहा दशकांपासून सुरू असलेली गणेश विसर्जनाची परंपरा यंदाही उत्साहात आणि भक्तिमय वातावरणात कायम ठेवण्यात आली. सोमेश्वर तरुण मंडळाच्या वतीने शिस्तबद्ध नियोजन करत लाडक्या गणरायाला भावपूर्ण निरोप देण्यात आला असून.
देवभूमी तीर्थक्षेत्र म्हणून ओळखल्या जाणाऱ्या सोमेश्वर परिसरातील पवित्र रामेश्वर मंदिरासमोरील पुष्करणीमध्ये गणरायाचे विसर्जन करण्यात आले. यावेळी मोठ्या संख्येने ग्रामस्थ, महिला व तरुण मंडळाचे कार्यकर्ते उपस्थित होते. गणपती बाप्पा मोरया पुढच्या वर्षी लवकर या’च्या जयघोषाने परिसर भक्तिमय झाला.
सोमेश्वर तरुण मंडळाची सहा दशकांची परंपरा असून, दरवर्षी गणेशोत्सवाच्या दहा दिवसांत विविध छोटेखानी धार्मिक व सामाजिक उपक्रमांचे आयोजन केले जाते.
यंदाही मंडळाने संपूर्ण गणेशोत्सव काळात शिस्तबद्ध नियोजन आणि उत्साहपूर्ण वातावरण कायम ठेवले. पिंपरी दुमाला येथील सोमेश्वर परिसराला धार्मिक महत्त्व असून, येथील सोमेश्वर-रामेश्वर देवस्थान भाविकांचे श्रद्धास्थान आहे. याच पवित्र परिसरात गणरायाला निरोप देताना ग्रामस्थांनी भक्ती आणि आनंदाचा अनोखा संगम अनुभवला.
यंदाच्या गणेशोत्सवाच्या आयोजनात , तंटामुक्ती अध्यक्ष अर्जुन शेळके,माजी उपसरपंच अशोक दुर्गे, सोमेश्वर देवस्थानचे खजिनदार शेखर पाटेकर, एचआर मॅनेजर प्रकाश चिखले, आदर्श शेतकरी योगेश चिखले, लहू पडवळ, कृष्णमूर्ती शेटेकर, पुजारी गणेश तक्ते, सोसायटी संचालक कैलास शेलार, किरण चिखले, रंगनाथ तक्ते यांच्यासह ग्रामस्थांनी विशेष सहभाग घेतला.
गणेश विसर्जनाच्या वेळी मंडळाच्या कार्यकर्त्यांनी केलेल्या नियोजनामुळे संपूर्ण कार्यक्रम शांततेत आणि उत्साहात पार पडला. सहा दशकांची परंपरा पुढे नेत सोमेश्वर तरुण मंडळाने यंदाही गणेशोत्सवाची सांगता भक्तिमय वातावरणात पार पडली आहे.
