पुणे : अनैतिक संबंधाच्या कारणावरून रिक्षाचालकाला कारने धडक देऊन खाली पाडल्यानंतर लोखंडी पाईपने डोक्यात मारहाण करून खून केल्याचा प्रकार वाघोली येथे घडला. या प्रकरणी वाघोली पोलिसांनी आठ जणांना अटक केली आहे.
नवनाथ दिगंबर सोन्नर (वय ३५, रा. चौधरी वस्ती, खराडी) असे खून झालेल्या रिक्षाचालकाचे नाव आहे. नामदेव बाळासाहेब आळनुरे (वय २९, रा. वाकलगाव, ता. गंगाखेड, जि. परभणी), कैलास सुधाकर होरे (वय ३२, रा. चौधरी वस्ती, खराडी), बालाजी सोनाजी घनवटे (वय २२, रा. वाकलगाव, ता. गंगाखेड, जि. परभणी), अनिल सोपान घनवटे (वय २९, रा. आव्हाळवाडी, ता. हवेली), नितीन लक्ष्मण उमाप (वय २१, रा. काळुबाईनगर, वाघोली), रोहन रामचंद्र वाघमारे (वय २२, रा. लक्ष्मीनगर पोलीस चौकीजवळ, येरवडा) आणि अर्जुन ज्ञानेश्वर शेलार (वय २०, रा. पूर्वरंगनगर, भावडी रोड, वाघोली) अशी अटक केलेल्यांपैकी सात जणांची नावे आहेत. घटनेप्रकरणी आठ जणांना अटक करण्यात आली आहे.
ही घटना गुरुवारी (२४ सप्टेंबर) रात्री साडेदहा वाजण्याच्या सुमारास वाघोली येथील बाजारतळ मैदानावर घडली.
पोलिसांच्या माहितीनुसार, नवनाथ सोन्नर याचे आरोपींपैकी एकाच्या नातेसंबंधातील महिलेशी संबंध असल्याचा आरोप होता. हे संबंध सोडून देण्याबाबत त्याला यापूर्वी अनेकदा सांगण्यात आले होते. मात्र, त्याने हे म्हणणे ऐकले नसल्याचा आरोप आहे. या कारणावरून आरोपींनी नवनाथला बाजारतळ मैदानावर बोलावले.
नवनाथ मैदानात आल्यानंतर आरोपींनी त्याला स्वीफ्ट कारने जोरात धडक दिली. त्यामुळे तो खाली पडला. त्यानंतर त्याला लाथाबुक्क्यांनी मारहाण करण्यात आली. तसेच लोखंडी पाईपने डोक्यात मारहाण करून गंभीर जखमी केल्याचा आरोप आहे. या हल्ल्यात नवनाथचा मृत्यू झाला.
घटनेची माहिती मिळताच वाघोली पोलिसांनी बाजारतळ मैदानावर धाव घेतली आणि आरोपींना ताब्यात घेऊन अटक केली. या प्रकरणाचा तपास पोलीस उपनिरीक्षक शहादेव हवाले करीत आहेत.
