पुणे: राज्यातील दूध भेसळ प्रकरणाविरोधात अन्न व औषध प्रशासनाने मोठी कारवाई केली आहे. अन्न व औषध प्रशासनाचे आयुक्त तुकाराम मुंढे यांच्या मार्गदर्शनाखाली आणि पुणे ग्रामीण पोलिसांच्या सहकार्याने राबविण्यात आलेल्या संयुक्त मोहिमेत मोठे दूध भेसळ रॅकेट उघडकीस आले आहे. या कारवाईत १३ जणांना अटक करण्यात आली असून, सुमारे अडीच ते तीन कोटी रुपयांचा मुद्देमाल जप्त करण्यात आला आहे.
राज्यातील विविध भागांत मोठ्या प्रमाणावर भेसळयुक्त दूध पुरवले जात असल्याची गोपनीय माहिती अन्न व औषध प्रशासनाला मिळाली होती. त्यानंतर आयुक्त तुकाराम मुंढे यांनी पुणे ग्रामीणचे पोलीस अधीक्षक संदीपसिंग गिल यांच्याशी समन्वय साधून संयुक्त कारवाईची योजना आखली.
रविवारी पहाटे अन्न व औषध प्रशासन आणि पुणे ग्रामीण पोलिसांच्या स्थानिक गुन्हे शाखेच्या पथकांनी एकाच वेळी पुणे जिल्ह्यातील मंचरसह अहिल्यानगर, सांगली, छत्रपती संभाजीनगर जिल्ह्यातील सिल्लोड आणि सोलापूर जिल्ह्यातील अकलूज येथे छापेमारी केली. या कारवाईत अनेक ठिकाणी भेसळयुक्त दूध तयार करण्याचा प्रकार उघडकीस आला.
तपासादरम्यान मंचर हे या रॅकेटचे प्रमुख केंद्र असल्याचे समोर आले. तसेच खेड, आंबेगाव, जुन्नर आणि शिरूर तालुक्यातील काही ठिकाणीही छापे टाकण्यात आले. या ठिकाणांहून राज्यातील विविध भागांत रासायनिक भेसळ केलेल्या दुधाचा पुरवठा होत असल्याचा संशय व्यक्त करण्यात आला आहे.
प्राथमिक तपासात आरोपी शुद्ध दुधात मोठ्या प्रमाणावर रासायनिक मिश्रण मिसळून त्याचा पुरवठा करत असल्याचे समोर आले आहे. १,००० लिटर शुद्ध दुधात सुमारे ५०० लिटर रासायनिक मिश्रण, तर ५०० लिटर दुधात सुमारे ३०० लिटर भेसळयुक्त द्रव्य मिसळले जात असल्याची माहिती तपासात पुढे आली आहे. हा प्रकार गेल्या दोन वर्षांपासून सुरू असल्याचा संशयही व्यक्त करण्यात आला आहे.
या कारवाईनंतर अन्न व औषध प्रशासनाने जनतेच्या आरोग्याशी तडजोड करणाऱ्यांविरुद्ध कठोर कारवाई सुरूच राहणार असल्याचे स्पष्ट केले आहे. या रॅकेटमध्ये सहभागी असलेल्या सर्व संबंधितांचा शोध घेऊन त्यांच्यावर कायदेशीर कारवाई केली जाणार असल्याचे प्रशासनाने सांगितले आहे.
