सोलापूर : प्रेमसंबंधातून निर्माण झालेल्या तणावामुळे सोलापुरातील सात रस्ता परिसरात 21 वर्षीय तरुणाचा मृत्यू झाल्याची दुर्दैवी घटना समोर आली आहे. चंद्रकुमार शिवा गुडशेललू असे मृत तरुणाचे नाव आहे. तो म्युनिसिपल कॉलनी परिसरात कुटुंबासह राहत होता. 30 सप्टेंबर रोजी दुपारी ही घटना घडली. या प्रकारामुळे गुडशेललू कुटुंबावर दुःखाचा डोंगर कोसळला असून परिसरात हळहळ व्यक्त केली जात आहे.
मिळालेल्या माहितीनुसार, चंद्रकुमारचे एका तरुणीसोबत प्रेमसंबंध होते. काही दिवसांपूर्वी दोन्ही कुटुंबांच्या संमतीने त्यांचा साखरपुडाही झाला होता. त्यामुळे पुढील आयुष्याबाबत त्याने अनेक स्वप्ने पाहिली होती. मात्र, साखरपुड्यानंतर लग्नाच्या विषयावरून परिस्थिती बदलल्याचे सांगितले जात आहे.
तरुणीच्या कुटुंबाकडून लग्नाबाबत टाळाटाळ होत असल्याने चंद्रकुमार अस्वस्थ झाला होता. या परिस्थितीमुळे गेल्या काही दिवसांपासून तो मानसिक तणावात असल्याची माहिती समोर आली आहे. त्याने सोशल मीडियावर ठेवलेल्या स्टेटसमुळे त्याच्या मनातील अस्वस्थता आणि भावनिक स्थितीची कल्पना येत असल्याचे नातेवाईकांनी सांगितले.
30 सप्टेंबर रोजी दुपारी सुमारे 1:30 वाजता त्याने राहत्या घरात टोकाचे पाऊल उचलले. कुटुंबीयांच्या शासकीय रुग्णालयात नेले. मात्र, डॉक्टरांनी तपासणीनंतर त्याला मृत घोषित केले. या घटनेची नोंद सिव्हिल पोलिस चौकीत करण्यात आली आहे. या प्रकरणाच्या पार्श्वभूमीवर पोलिसांकडून आवश्यक तपास केला जात आहे.
