पुणे: अंगारकी चतुर्थीनिमित्त श्रीमंत दगडूशेठ हलवाई गणपतीच्या दर्शनासाठी पुण्याकडे निघालेल्या दाम्पत्याला जुन्या कात्रज घाटात लुटल्याची घटना समोर आली आहे. पहाटेच्या सुमारास बोगद्याजवळ दुचाकी अडवून 3 जणांनी महिलेच्या गळ्यातील सोन्याचे मंगळसूत्र जबरदस्तीने काढून घेतले. या दागिन्याची किंमत सुमारे 1 लाख रुपये असल्याचे सांगण्यात आले आहे.
या घटनेनंतर पोलिसांनी तातडीने तपास सुरू केला. तांत्रिक तपासाच्या मदतीने काही तासांतच संशयित आरोपींपर्यंत पोहोचत तिघांना ताब्यात घेण्यात आले. हे तिन्ही आरोपी पिंपरी परिसरातील असल्याची माहिती पोलिसांनी दिली आहे.
मिळालेल्या माहितीनुसार, खेड शिवापूर परिसरात राहणारे 46 वर्षीय नागरिक आणि त्यांची पत्नी मंगळवारी पहाटे दुचाकीवरून पुण्याच्या दिशेने निघाले होते. अंगारकी चतुर्थी असल्याने गणपती दर्शनासाठी ते शहरात येत होते. प्रवासादरम्यान ते जुन्या कात्रज बोगद्याजवळ पोहोचले.
याच ठिकाणी अंधाराचा फायदा घेत काही जणांनी त्यांची दुचाकी अडवली. आरोपींनी दाम्पत्याला धमकावले आणि महिलेच्या गळ्यातील मंगळसूत्र हिसकावून घेतले. त्यानंतर तिघेही घटनास्थळावरून पसार झाले. अचानक घडलेल्या या प्रकारामुळे दाम्पत्य घाबरले.
घटनेनंतर त्यांनी पोलिसांशी संपर्क साधून संपूर्ण प्रकार सांगितला. पोलिसांनी प्रकरणाचे गांभीर्य लक्षात घेऊन तातडीने तपासाची दिशा निश्चित केली. तांत्रिक माहितीच्या आधारे शोध घेत पोलिसांनी तौहिद असल शहा (वय 23), सुलेमान यासिन शेख (वय 21) आणि रोहित बबलू सिंग (वय 20), तिघेही रा. पिंपरी, यांना अटक केली. या आरोपींनी कात्रज घाट किंवा परिसरात यापूर्वी अशाच प्रकारच्या घटना केल्या आहेत का, याचा तपास सध्या सुरू आहे.
