नवी मुंबई : अमली पदार्थांची तस्करी करणाऱ्या आंतरराष्ट्रीय रॅकेटचा नवी मुंबई पोलिसांनी पर्दाफाश केला आहे. या कारवाईत पोलिसांनी आठ आरोपींना अटक केली असून, त्यांच्याकडून दोन कोटी २० लाख रुपयांचा मुद्देमाल जप्त केला आहे. अटक केलेल्या आरोपींमध्ये पाच आफ्रिकन नागरिक आणि तीन भारतीय नागरिकांचा समावेश आहे. हे आरोपी मुंब्रा परिसरात राहून अमली पदार्थांची तस्करी करत असल्याची माहिती तपासातून समोर आली आहे.
या कारवाईसाठी पाच पोलीस अधिकारी आणि २० पोलीस अंमलदारांच्या पथकाने सापळा रचला होता. मुंब्रा पोलिसांच्या मदतीने दिवा-मुंब्रा परिसरात ही कारवाई करण्यात आली. तळोजा पोलीस ठाण्यात दाखल असलेल्या अमली पदार्थांच्या गुन्ह्याचा तपास करताना पोलिसांना या रॅकेटविषयी महत्त्वाची माहिती मिळाली होती. त्यानंतर पोलिसांनी संबंधित आरोपींचा शोध घेऊन कारवाई केली.
या कारवाईदरम्यान पोलिसांनी दोन किलो १८ ग्रॅम एमडी ड्रग्ज, ३१६.५ ग्रॅम कोकेन आणि सहा महागडे मोबाईल फोन जप्त केले आहेत. जप्त केलेल्या मुद्देमालाची एकूण किंमत दोन कोटी २० लाख रुपये असल्याची माहिती देण्यात आली आहे. या अमली पदार्थांचा पुरवठा कुठून केला जात होता आणि त्यांची विक्री कोणाला केली जाणार होती, याचा तपास पोलीस करत आहेत.
या प्रकरणात अकुबा केनेथ आणि संडे इझिक या दोन नायजेरियन नागरिकांना दिवा परिसरातून ताब्यात घेण्यात आले आहे. हे दोघेही दिवा परिसरात राहत असल्याची माहिती पोलिसांना मिळाली होती. त्यानुसार पोलिसांनी शोधमोहीम राबवून त्यांच्याविरोधात कारवाई केली.
तळोजा पोलिसांच्या माहितीनुसार, या आंतरराष्ट्रीय अमली पदार्थ तस्करी प्रकरणात आतापर्यंत आठ आरोपींना अटक करण्यात आली आहे. त्यापैकी पाच आफ्रिकन आणि तीन भारतीय नागरिक आहेत. या रॅकेटमध्ये आणखी कोणाचा सहभाग आहे का, तसेच अमली पदार्थांचा पुरवठा आणि वितरणाची साखळी किती मोठी आहे, याचा शोध घेण्यासाठी नवी मुंबई पोलीस पुढील तपास करत आहेत.
