पुणे : मार्केट यार्ड परिसरात व्यापाऱ्याच्या कर्मचाऱ्याला अडवून 30 लाख रुपये लुटल्याचा गंभीर प्रकार घडला असताना, या घटनेची नोंद दरोड्याऐवजी ‘मिसिंग’ म्हणून केल्याचा धक्कादायक प्रकार समोर आला आहे. या प्रकरणात गंभीर निष्काळजीपणा केल्याचा ठपका ठेवत पोलीस आयुक्त अमितेश कुमार यांनी मार्केटयार्ड पोलीस ठाण्याचे वरिष्ठ पोलीस निरीक्षक विश्वजीत भाऊसाहेब जगताप यांना तडकाफडकी निलंबित केले आहे.
पोलिसांनी दिलेल्या माहितीनुसार, 7 ऑक्टोबर 2026 रोजी मार्केटयार्ड परिसरात एका व्यापाऱ्याच्या कर्मचाऱ्याकडील 30 लाख रुपये दुचाकीवरून आलेल्या पाच जणांच्या टोळक्याने लुटून नेले होते. या गंभीर घटनेची नोंद योग्य स्वरूपात न करता ‘मिसिंग’ म्हणून करण्यात आल्याचे वरिष्ठ अधिकाऱ्यांच्या चौकशीत समोर आले. दरोड्यासारखा गंभीर गुन्हा दडपण्याचा प्रकार प्रथमदर्शनी निष्पन्न झाल्याने संबंधित अधिकाऱ्यावर निलंबनाची कारवाई करण्यात आली.
दरम्यान, स्वारगेट पोलीस ठाण्याच्या हद्दीतील सॅलसबरी पार्क परिसरात एका व्यापाऱ्याला मारहाण करून त्याच्याकडील साडेचार लाख रुपयांची बॅग हिसकावण्याचा प्रयत्न झाला होता. मात्र, व्यापाऱ्याने बॅग न सोडल्याने आणि नागरिक जमा होऊ लागल्याने आरोपी पळून गेले होते. या प्रकरणी स्वारगेट पोलिसांनी जबरी चोरीच्या प्रयत्नाचा गुन्हा दाखल करून तपास सुरू केला.
दरम्यान, परिसरातील सुमारे 200 सीसीटीव्ही कॅमेऱ्यांचे फुटेज तपासल्यानंतर निहाल नवनाथ अडागळे (वय-19, रा. मुंढवा) आणि यश प्रवीण सोनवणे (वय-24, रा. मांजरी) या दोघांना अटक करण्यात आली.
अटक केलेल्या आरोपींकडे चौकशी केली असता, त्यांनी मार्केटयार्ड परिसरात व्यापाऱ्याच्या कर्मचाऱ्याला लुटून 30 लाख रुपये चोरल्याची कबुली दिल्याचे समोर आले. त्यानंतर या प्रकरणाची वरिष्ठ पोलीस अधिकाऱ्यांनी चौकशी केली. यावेळी मार्केटयार्ड पोलीस ठाण्यात गंभीर गुन्ह्याची नोंद ‘मिसिंग’ म्हणून करण्यात आल्याचे उघड झाले.
दरम्यान, या प्रकारामुळे पोलिसांच्या कार्यपद्धतीवर प्रश्नचिन्ह निर्माण झाले आहे. गंभीर गुन्ह्याची योग्य नोंद न करणे, ही बेजबाबदारपणाची बाब असून, त्यामुळे पोलीस दलाची प्रतिमा मलिन होत असल्याचे नमूद करत पोलीस आयुक्त अमितेश कुमार यांनी वरिष्ठ पोलीस निरीक्षक विश्वजीत जगताप यांच्यावर निलंबनाची कारवाई केली.
