पुणे : महानगरपालिकेतील अधिकारी आणि कर्मचाऱ्यांसाठी अत्यंत आनंदाची बातमी समोर आली आहे. महापालिकेच्या पक्षनेत्यांच्या बैठकीत कर्मचाऱ्यांना बोनस देण्याचा महत्त्वपूर्ण निर्णय घेण्यात आला असून, महापौर मंजूषा नागपुरे यांनी याविषयीची अधिकृत घोषणा केली आहे. या निर्णयामुळे महापालिकेच्या हजारो कर्मचाऱ्यांची दिवाळी आणि इतर सण अधिक उत्साहात साजरी होणार आहे
प्रशासनाने घेतलेल्या या नव्या निर्णयानुसार आगामी 5 वर्षांसाठी बोनसचा नवा करार लागू करण्यात आला आहे. विशेष म्हणजे दरवर्षी या बोनसच्या रकमेत प्रत्येकी 2 हजार रुपयांची वाढ होणार आहे. त्यानुसार चालू वर्षात कर्मचाऱ्यांना 27 हजार रुपये बोनस मिळणार असून, 2029-30 पर्यंत ही रक्कम 35 हजार रुपयांपर्यंत पोहोचणार आहे.
या योजनेचा फायदा केवळ कायमस्वरूपी कर्मचाऱ्यांनाच नव्हे, तर इतर अनेक घटकांना होणार आहे. यामध्ये महापालिकेतील सर्व अधिकारी व कर्मचारी, रोजंदारीवर काम करणारे कामगार, शिक्षण मंडळासह माध्यमिक व तांत्रिक शिक्षण विभागातील शिक्षक आणि शिक्षकेतर कर्मचारी, तसेच बालवाडी शिक्षिका व सेविकांचा समावेश करण्यात आला आहे.
नव्याने सेवेत रुजू झालेल्या तरुणांसाठीही महापालिकेने मोठा दिलासा दिला आहे. यापूर्वी बोनस मिळवण्यासाठी किमान 1 वर्षाची सेवा पूर्ण असणे अनिवार्य होते. मात्र, आता ही अट शिथिल करण्यात आली असून, ज्या कर्मचाऱ्यांनी किमान 180 दिवस प्रत्यक्ष काम पूर्ण केले आहे, ते सर्वजण या बोनससाठी पात्र ठरणार आहेत.
ऐन सणाच्या काळात महापालिका प्रशासनाने सुमारे 18 हजार कर्मचाऱ्यांच्या हिताचा हा निर्णय घेतल्यामुळे कर्मचाऱ्यांमध्ये आनंदाचे वातावरण पसरले असून सर्व स्तरातून या निर्णयाचे स्वागत केले जात आहे.
