पुणे : सावित्रीबाई फुले पुणे विद्यापीठाच्या विद्यार्थ्यांसाठी एक मोठी बातमी समोर आली आहे. आगामी 31 ऑक्टोबर रोजी होणाऱ्या सर्व अभ्यासक्रमांच्या परीक्षा विद्यापीठाने रद्द केल्या आहेत. राष्ट्रपतींचा दौरा आणि सिंहस्थ कुंभमेळ्याचा ध्वजारोहण सोहळा यांमुळे नाशिकमध्ये वाहतुकीची मोठी समस्या निर्माण होण्याची शक्यता होती. त्यामुळे सुरळीत वाहतुकीसाठी नाशिक महानगरपालिका आयुक्तांनी विद्यापीठाकडे परीक्षा पुढे ढकलण्याची विनंती केली होती. या सर्व परिस्थितीचा गांभीर्याने विचार करून विद्यापीठ प्रशासनाने हा निर्णय घेतला आहे.
विद्यापीठाच्या परीक्षा व मूल्यमापन मंडळाचे संचालक डॉ. राजेंद्र तलवारे यांनी याविषयीचे अधिकृत परिपत्रक प्रसिद्ध केले आहे. या बदलामुळे पुणे, अहिल्यानगर आणि नाशिक या तिन्ही जिल्ह्यांतील हजारो विद्यार्थ्यांना मोठा दिलासा मिळाला आहे. राष्ट्रपतींच्या दौऱ्यामुळे आणि लाखो भाविकांच्या उपस्थितीमुळे शहरातील रस्ते वाहतूक विस्कळीत होऊ नये, हा यामागील मुख्य उद्देश आहे.
आता या रद्द करण्यात आलेल्या सर्व विषयांच्या परीक्षा आगामी 11 नोव्हेंबर रोजी पार पडणार आहेत. विशेष म्हणजे, परीक्षेच्या वेळेत कोणताही बदल करण्यात आलेला नाही. जुन्या वेळापत्रकानुसारच तीच वेळ कायम ठेवण्यात आली आहे. त्यामुळे सर्व संबंधित विद्यार्थ्यांनी नवीन तारखेची नोंद करून त्यानुसार अभ्यासाची तयारी करावी, असे आवाहन विद्यापीठातर्फे करण्यात आले आहे.
