पुणे : सिंहगड रोड पोलीस ठाण्याच्या हद्दीत घडलेल्या अल्पवयीन मुलीवरील अत्याचार आणि हत्या प्रकरणात पुणे येथील अतिरिक्त सत्र न्यायालयाने महत्त्वपूर्ण निकाल दिला आहे. 2018 मध्ये आरोपीने अल्पवयीन मुलीवरील अत्याचार आणि हत्या केली होती. या प्रकरणातील आरोपी नितीन बाबासाहेब दामोदर याला न्यायालयाने मरेपर्यंत जन्मठेपेची सक्तमजुरीची शिक्षा सुनावली आहे. तसेच 5,000 रुपये दंड ठोठावण्यात आला असून, दंड न भरल्यास 3 महिने साधा कारावास भोगावा लागणार आहे.
शिवाजीनगर येथील सत्र न्यायालयात 31 ऑक्टोबर 2026 रोजी या खटल्याचा निकाल जाहीर करण्यात आला. जिल्हा व अतिरिक्त सत्र न्यायाधीश एस. आर. साळुंखे यांनी हा निर्णय दिला. या प्रकरणात भारतीय दंड संहितेच्या कलम 302, 376, 377 आणि 376(अ) तसेच बालकांचे लैंगिक अपराधांपासून संरक्षण कायदा (पोक्सो) अंतर्गत कलम 4, 5(एन), 6 आणि 8 नुसार गुन्हा दाखल करण्यात आला होता. यासोबतच बालकांचे संरक्षण कायद्यातील कलम 42 चा आधार घेत न्यायालयाने शिक्षा सुनावली.
या प्रकरणाचा तपास महिला पोलीस निरीक्षक संगीता यादव यांनी केला. सध्या त्या सीआयडीमध्ये सहाय्यक पोलीस आयुक्त म्हणून कार्यरत आहेत. न्यायालयात सरकारी पक्षाची बाजू विशेष सरकारी वकील ए. के. शर्मा यांनी मांडली.
सिंहगड रोड पोलीस ठाण्याचे वरिष्ठ पोलीस निरीक्षक विनय पाटणकर आणि पोलीस निरीक्षक (गुन्हे) समीर गायकवाड यांच्या मार्गदर्शनाखाली न्यायालयीन कामकाजासाठी पोलीस पथकाने सहकार्य केले.
या प्रकरणात फिर्यादी विजय गंगाराम भोसले (वय 30, रा. पोकळे वस्ती, पुणे) आहेत.
