पुणे : नुकत्याच झालेल्या पुणे पदवीधर व शिक्षक मतदारसंघाच्या निवडणुकीतील पराभवानंतर महायुतीमधील अंतर्गत मतभेद आता चव्हाट्यावर आले आहेत. शिवसेनेने ऐनवेळी घेतलेल्या भूमिकेमुळे आणि पक्षांतर्गत बंडखोरीमुळे भाजपच्या उमेदवाराचा पराभव झाल्याचा थेट आरोप भाजप प्रवक्ते नवनाथ बन यांनी केला आहे. वरिष्ठ पातळीवर या संपूर्ण प्रकाराचा खुलासा व्हावा, अशी मागणी त्यांनी केली आहे.
नवनाथ बन यांच्या सांगण्यानुसार, पुण्यात शिवसेनेने सुरुवातीला मंगेश चिवटे यांना एबी फॉर्म देऊन अधिकृत उमेदवारी दिली होती. परंतु नंतर त्यांचा अर्ज मागे घेत अपक्ष उमेदवार सचिन सानप यांना अचानक पाठिंबा दिला. सानप यांना मिळालेली 16 हजार मते जर महायुतीच्या अधिकृत उमेदवार स्मिता जाधव यांना मिळाली असती, तर त्या पहिल्याच फेरीत विजयी झाल्या असल्या असत्या. भाजप, शिवसेना आणि राष्ट्रवादी काँग्रेसने एकत्र मिळून ताकदीने काम केले असते, तर महायुतीचा पराभव होणे अशक्य होते.
त्याचप्रमाणे, शिवसेनेचे पुणे महानगरप्रमुख रवींद्र धंगेकर यांनी निवडणुकीदरम्यान भाजपविरोधी उमेदवाराचा उघडपणे प्रचार केल्याचा दावा बन यांनी केला. धंगेकर यांनी आपल्या अधिकृत सोशल मीडिया अकाऊंटवरून भाजप उमेदवाराच्या विरोधात पोस्ट शेअर केल्याचे पुरावे उपलब्ध असल्याचे त्यांनी सांगितले. वैयक्तिक पातळीवर धंगेकर यांना शहरात फारसे स्थान नसले, तरी त्यांनी शिवसेनेच्या पदाचा वापर करून महायुतीच्या उमेदवाराला नुकसान पोहोचवले, असे बन म्हणाले.
अमरावतीत भाजपच्या बंडखोरांवर सहा वर्षांसाठी निलंबनाची कारवाई करण्यात आली आहे. त्याच धर्तीवर उपमुख्यमंत्री एकनाथ शिंदे यांनीही पक्षविरोधी काम करणाऱ्या रवींद्र धंगेकरांवर कडक कारवाई करावी, असा सवाल भाजप प्रवक्त्यांनी उपस्थित केला आहे. निवडणुकीपूर्वी महायुतीत समन्वयाचे प्रयत्न झाले होते, मात्र ऐनवेळी पाठिंबा बदलण्यामागील हेतू स्पष्ट होणे गरजेचे असल्याचे त्यांनी आवर्जून नमूद केले.
