यवत : कुरकुंभ येथील सिप्ला कंपनीतून काम संपवून दुचाकीवरून घरी परतणाऱ्या नानगाव (ता. दौंड) येथील 27 वर्षीय तरुणाचा कडेठाणजवळ झालेल्या अपघातात मृत्यू झाला. राहुल दिलीप खळदकर असे मृत तरुणाचे नाव आहे. 21 सप्टेंबर रोजी सायंकाळी हा अपघात झाला होता. याप्रकरणी यवत पोलीस ठाण्याच्या पाटस पोलीस दूरक्षेत्रात 27 ऑक्टोबर रोजी गुन्हा दाखल करण्यात आला आहे.
पोलिसांनी दिलेल्या माहितीनुसार, राहुल हा कुरकुंभ येथील सिप्ला कंपनीत कामाला होता. 21 सप्टेंबर रोजी सकाळी तो नेहमीप्रमाणे दुचाकीवरून कामावर गेला होता. सायंकाळी काम संपल्यानंतर तो दुचाकीवरून घरी निघाला. दरम्यान, वरवंड ते कडेठाण रस्त्यावर कडेठाण रेल्वे स्थानकाच्या पुढे सुमारे 100 मीटर अंतरावर त्याच्या दुचाकीचा अपघात झाला.
राहुलच्या ताब्यातील दुचाकी रस्त्यावर पडलेल्या विद्युत सिमेंटच्या खांबाला धडकली. या अपघातात त्याच्या डोक्याला तसेच हातापायांना गंभीर दुखापत झाली. जखमी अवस्थेत त्याला वरवंड येथील अक्षय नर्सिंग होममध्ये उपचारासाठी दाखल करण्यात आले; मात्र डॉक्टरांनी उपचारापूर्वीच त्याला मृत घोषित केले.
त्यानंतर मृतदेह यवत ग्रामीण रुग्णालयात शवविच्छेदनासाठी नेण्यात आला. अंत्यविधी व धार्मिक कार्यक्रम पूर्ण झाल्यानंतर मृताच्या चुलत भावाने पोलिसांत तक्रार दिली. या प्रकरणी भारतीय न्याय संहिता आणि मोटार वाहन कायद्यातील संबंधित कलमांनुसार गुन्हा नोंदविण्यात आला असून, पुढील तपास पोलीस हवालदार काळे करीत आहेत.
