पुणे: पुण्यातील रविवार पेठ परिसरातून मोठ्या आर्थिक फसवणुकीची घटना समोर आली आहे. कमी मजुरीत सोन्याचे दागिने तयार करून देण्याचे आमिष दाखवत एका सराफ व्यावसायिकाकडून १८५ तोळे शुद्ध सोने घेऊन दोन जणांनी फसवणूक केल्याचा प्रकार उघडकीस आला आहे. या प्रकरणात सराफ व्यावसायिकाचे तब्बल २ कोटी ५९ लाख रुपयांचे नुकसान झाले असून, फरासखाना पोलिसांनी दोघांविरुद्ध गुन्हा दाखल केला आहे.
याप्रकरणी रविवार पेठेतील सराफ व्यावसायिक राजेंद्र बाबूलाल सोळंकी यांनी फिर्याद दिली आहे. त्यानुसार प्रभंजन शांती डोलाई (वय ३८, रा. गणेश पेठ, मूळ पश्चिम बंगाल) आणि सिद्धार्थ चक्रवर्ती यांच्याविरुद्ध फसवणुकीचा गुन्हा नोंदवण्यात आला आहे.
पोलिसांनी दिलेल्या माहितीनुसार, राजेंद्र सोळंकी यांचे रविवार पेठेत सोन्या-चांदीच्या दागिन्यांचे दुकान आहे. आरोपी प्रभंजन डोलाई याने त्यांच्याशी ओळख वाढवत विश्वास संपादन केला. बाजारभावापेक्षा कमी मजुरीत दर्जेदार सोन्याचे दागिने तयार करून देण्याचे आश्वासन त्याने दिले. त्याच्या बोलण्यावर विश्वास ठेवून सोळंकी यांनी दागिने तयार करण्यासाठी १८५ तोळे शुद्ध सोने त्याच्याकडे दिले.
मात्र, ठरलेल्या कालावधीत आरोपींनी दागिने तयार करून दिले नाहीत. तसेच त्यांच्याकडे दिलेले शुद्ध सोनेही परत केले नाही. वारंवार मागणी करूनही प्रतिसाद मिळत नसल्याने आपली फसवणूक झाल्याचे लक्षात आल्यानंतर सोळंकी यांनी फरासखाना पोलीस ठाण्यात तक्रार दाखल केली.
तक्रारीनंतर पोलिसांनी दोन्ही आरोपींविरुद्ध गुन्हा नोंदवला असून, या प्रकरणाचा पुढील तपास सहाय्यक पोलीस निरीक्षक स्वप्नील पाटील करत आहेत. आरोपींनी आणखी कोणाची अशाच पद्धतीने फसवणूक केली आहे का, याचाही तपास पोलिसांकडून केला जात आहे.
