पुणे : भोरचे तहसीलदार राजेंद्र नजन यांनी शुक्रवार (दि.३ )रोजी शहराच्या जवळच असणाऱ्या बसरापुर (ता. भोर) गावाला भेट देत मतदार निरीक्षण, संशोधन व मतदार यादी अद्ययावत करणे एस आय आर (SIR) या मोहिमेच्या कामाची प्रत्यक्ष पाहणी करत मार्गदर्शक सूचना दिल्या.गावातील जानकादेवी मंदिरात मतदार यादी कामाचा आढावा घेताना विद्यमान सरपंच नीलम झांजले, पोलिस पाटील विठ्ठल झांजले ,शाळेचे मुख्याध्यापक बी.एल.ओ.लक्ष्मण मांढरे, मंडल अधिकारी मनोज ढवळे , तलाठी सोनल भडके यांच्यासह इतर महसूल कर्मचारी व गावातील ग्रामस्थ उपस्थित होते.
बी.एल.ओ. व तलाठी यांनी आतापर्यंत पूर्ण केलेल्या कामाचा अहवाल सादर केला. नवीन मतदारांची नोंदणी, मयत व स्थलांतरित मतदारांची नावे वगळणे, दुबार नावे तपासून वगळणे व पत्त्यातील दुरुस्त्या या बाबींवर विशेष भर देण्यात आल्याचे सांगण्यात आले.गावातील मतदार यादी नुतनीकरण कामाची सविस्तर माहिती तहसीलदार यांनी घेतली. भोर पोलीस पाटील संघाचे उपाध्यक्ष विठ्ठल झांजले यांनीही सर्व पोलीस पाटलांना या मोहिमेबाबत व कामकाजाबाबत माहिती दिली असल्याचे सांगितले.
यावेळी बोलताना तहसीलदार नजन यांनी आगामी निवडणुकांच्या पार्श्वभूमीवर मतदार यादी अचूक व कोणतीही त्रुटी राहणार नाही. तसेच दुबार म्हणजेच एका व्यक्तीचे दोन जागी मतदान असणार नाही हे घरोघरी जाऊन मतदार यादी अद्ययावत करणे अत्यंत महत्त्वाचे असल्याचे सांगितले. एकही पात्र मतदार नोंदणीपासून वंचित, अपात्र राहणार नाही याची दक्षता घेण्याच्या सूचना त्यांनी दिल्या. तरुण मतदारांची जास्तीत जास्त नोंदणी करावी, सर्व कर्मचाऱ्यांनी समन्वयाने काम करावे असेही त्यांनी सांगितले.
