पुणे, ता. ११ : हडपसर येथील अॅमनोरा मॉलमधील एका खासगी कार्यालयावर पुणे पोलिसांनी बुधवारी (ता. ११) दुपारी मोठी छापेमारी कारवाई केली. ऑनलाइन गेमिंग अॅपच्या माध्यमातून आर्थिक फसवणूक केल्याच्या संशयावरून तब्बल १४ जणांना ताब्यात घेण्यात आल्याची माहिती समोर आली आहे. या कारवाईमुळे सायबर गुन्हेगारीच्या एका मोठ्या रॅकेटचा पर्दाफाश होण्याची शक्यता व्यक्त केली जात आहे.
पोलिसांना गुप्त बातमीदारामार्फत माहिती मिळाली होती की, हडपसरमधील अॅमनोरा मॉल परिसरात एका कॉल सेंटरच्या माध्यमातून अवैध ऑनलाइन गेमिंग अॅप चालवून नागरिकांची आर्थिक फसवणूक केली जात आहे. या माहितीच्या आधारे पोलीस उपआयुक्त जीवन बेनिवाल यांच्या आदेशानुसार विशेष पथकाची स्थापना करण्यात आली.
मुंढवा, लोणी काळभोर, मांजरी तसेच सायबर पोलिसांच्या संयुक्त पथकाने चार सेक्टरमध्ये नियोजन करून छापेमारी केली. फॉरेन्सिक आणि सायबर तज्ज्ञांनाही या कारवाईत सहभागी करण्यात आले होते. पोलिसांनी अॅमनोरा मॉलमधील ‘अॅपेक्स अॅचीव्हर एलएलपी’ या कार्यालयावर धाड टाकत तेथील कामकाजाची पाहणी केली आणि उपस्थित कर्मचाऱ्यांची चौकशी सुरू केली.
कारवाईदरम्यान कार्यालयातील संगणक, लॅपटॉप, हार्डडिस्क, सर्व्हर, इलेक्ट्रॉनिक उपकरणे आणि महत्त्वाची कागदपत्रे तपासण्यात आली. प्राथमिक तपासात ऑनलाइन गेमिंग अॅपच्या माध्यमातून संशयास्पद आर्थिक व्यवहार होत असल्याची माहिती समोर आली आहे. याप्रकरणी १४ जणांना ताब्यात घेण्यात आले असून त्यांची कसून चौकशी सुरू आहे.
विशेष म्हणजे, बुधवारी दुपारपासून सुरू झालेली ही कारवाई गुरुवारी मध्यरात्रीपर्यंत सुरू होती. हडपसरमधील अॅमनोरा मॉलसह फुरसुंगी येथील इन्फोसिटीमधील आणखी एका कॉल सेंटरवरही पोलिसांनी एकाचवेळी छापेमारी केल्याची माहिती समोर आली आहे. या दोन्ही ठिकाणी मोठ्या प्रमाणावर पोलीस बंदोबस्त तैनात करण्यात आला होता.
सूत्रांच्या माहितीनुसार, पुणे पोलीस आयुक्तालयाच्या परिमंडळ-६ आणि सायबर पोलिसांच्या संयुक्त पथकातील २०० हून अधिक पोलीस अधिकारी व कर्मचारी या कारवाईत सहभागी झाले होते. पोलिसांनी दोन्ही कॉल सेंटर्सना चारही बाजूंनी वेढा घालत तपास सुरू केला. तब्बल १० ते १२ तास सुरू असलेल्या या कारवाईमुळे परिसरात मोठी खळबळ उडाली.
दरम्यान, जप्त करण्यात आलेल्या इलेक्ट्रॉनिक उपकरणांची सायबर आणि फॉरेन्सिक तज्ज्ञांकडून तपासणी केली जात आहे. या रॅकेटचा नेमका आवाका, आर्थिक उलाढाल, परदेशी कनेक्शन आहे का आणि किती नागरिकांची फसवणूक झाली आहे, याचा तपास सध्या सुरू आहे. या कारवाईमुळे पुणे शहरातील सायबर फसवणूक आणि अवैध ऑनलाइन गेमिंगच्या जाळ्यावर मोठा आघात झाल्याचे मानले जात आहे.
