दौंड, ता. २२ : दारू पिण्यासाठी पैसे देण्यास नकार दिल्याच्या रागातून एका महिलेला लाथाबुक्क्यांनी मारहाण करून, तिच्या मुलाच्या पॅन्टच्या खिशातून जबरदस्तीने 2 हजार रुपये हिसकावून नेल्याची घटना घडली. यावेळी लोखंडी पाईप उगारून धमकावल्याचा आरोपही करण्यात आला आहे. ही घटना दौंड शहरातील इंदिरानगर भाजीमंडई परिसरात सोमवारी (ता. 21) दुपारी चार वाजण्याच्या सुमारास घडली.
या प्रकरणी रेश्मा ज्ञानेश्वर आरके (वय-30, रा. इंदिरानगर भाजीमंडई, दौंड) यांनी दौंड पोलिस ठाण्यात फिर्याद दिली आहे. त्यावरून विशाल किसन थोरात आणि त्याच्या एका अनोळखी साथीदाराविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, सोमवारी दुपारी चारच्या सुमारास इंदिरानगर भाजीमंडई परिसरातील एका पडक्या इमारतीसमोर आरोपींनी फिर्यादी महिलेकडे दारू पिण्यासाठी पैसे मागितले. पैसे दे, अन्यथा दारू आणून दे, असे म्हणत तिच्याशी वाद घातला. यानंतर आरोपींनी फिर्यादीला लाथाबुक्क्यांनी मारहाण केल्याचा आरोप आहे. तसेच लोखंडी पाईप उगारून दहशत निर्माण करण्यात आली. त्यानंतर फिर्यादीच्या मुलगा सोहम याच्या पॅन्टच्या खिशातून 500 रुपयांच्या चार नोटा, अशी एकूण 2 हजार रुपयांची रोकड जबरदस्तीने काढून घेण्यात आली.
दरम्यान, आरोपींनी फिर्यादीच्या मुलाला धमकी दिल्याचेही तक्रारीत नमूद करण्यात आले आहे. या घटनेमुळे परिसरात काही काळ भीतीचे वातावरण निर्माण झाले. या प्रकरणी दौंड पोलिस ठाण्यातविविध कलमान्वये गुन्हा दाखल करण्यात आला आहे. तपास पोलीस उपनिरीक्षक रुपेश कदम करीत आहेत.
