मुंबई: संयुक्त अरब अमिरातीतील (UAE) फुजैराह येथे झालेल्या भीषण साखळी अपघातात 4 भारतीयांसह 14 जणांचा मृत्यू झाला आहे. या दुर्घटनेत 30 नागरिक जखमी झाले असून, त्यामध्ये 7 भारतीयांचा समावेश आहे. 12 नोव्हेंबर रोजी घडलेल्या या अपघातात ट्रकसह एकूण 23 वाहनांची धडक झाली. या घटनेमुळे रस्ते सुरक्षेचा प्रश्न पुन्हा ऐरणीवर आला आहे.

मृतांमध्ये केरळमधील मलप्पुरम जिल्ह्यातील एकाच कुटुंबातील 3 सदस्यांचा समावेश आहे. मोहम्मद अस्मिल, त्यांची जुळी बहीण मिस्ना जुबिन आणि 3 वर्षांचा भाचा मोहम्मद फैयस यांचा या दुर्घटनेत मृत्यू झाला. गुजरातमधील 13 वर्षीय आतिफ मोहम्मद इमरान मन्सूर याचाही मृतांमध्ये समावेश आहे. तो कुटुंबासह भारतात परतण्यासाठी विमानतळाकडे जात असताना हा अपघात झाला. त्याचे आई-वडील आणि बहीण जखमी झाले असून त्यांच्यावर उपचार सुरू आहेत.
प्राथमिक तपासानुसार, शेख खलिफा बिन झायेद रोडवर सलग दोन अपघात झाले. रस्त्याच्या बाजूला उभ्या असलेल्या ट्रकला एका वाहनाने धडक दिल्यानंतर दुसऱ्या ट्रकने अनेक वाहनांना धडक दिली. या धडकेनंतर ट्रक पलटी झाला. रस्त्याच्या दुरुस्तीचे काम सुरू असल्याने एका मार्गिकेवरील वाहतूक बंद होती. त्यामुळे अपघाताची परिस्थिती अधिक गंभीर झाली. या प्रकरणाचा पुढील तपास सुरू आहे. भारतीय वाणिज्य दूतावासाकडून मृतांच्या कुटुंबीयांना आणि जखमींना मदत केली जात आहे.

दरम्यान, महाराष्ट्रातही समृद्धी महामार्गावर 13 नोव्हेंबर रोजी भीषण साखळी अपघात झाला. बुलढाणा जिल्ह्यातील सिंदखेडराजा तालुक्यात दुसरबीडजवळ तब्बल 19 कार एकमेकांवर आदळल्या. या घटनेत 8 जण जखमी झाले.

अपघातग्रस्त कंटेनर बाजूला काढण्याचे काम सुरू असल्याने मुंबईकडे जाणारी वाहतूक थांबवण्यात आली होती. याचवेळी भरधाव ट्रकचालकाचे नियंत्रण सुटले आणि उभ्या वाहनांना धडक बसली. परदेशातील आणि महाराष्ट्रातील या दोन्ही घटनांमुळे वाहनांचा वेग, सुरक्षित अंतर आणि रस्त्यावरील काळजी यांचे महत्त्व पुन्हा अधोरेखित झाले आहे.






