थेऊर, (पुणे) : चारित्र्याच्या संशयावरून दारूच्या नशेत पतीने पत्नीवर लोखंडी हुकच्या बेल्टने जीवघेणा हल्ला केल्याची घटना उघडकीस आली. कोलवडी (ता. हवेली) ग्रामपंचायत हद्दीत ही घटना घडली. या हल्ल्यात पत्नीच्या डोक्याला गंभीर दुखापत झाली असून पतीविरुद्ध लोणीकंद पोलीस ठाण्यात पतीविरुद्ध गुन्हा दाखल करण्यात आला आहे. ही घटना शुक्रवारी (ता. 10) रोजी सायंकाळी पाचच्या सुमारास घडली. सागर राजू ऊर्फ राजेंद्र भालसिंग (वय-32, रा. कोलवडी, ता. हवेली) असे गुन्हा दाखल करण्यात आलेल्या पतीचे नाव आहे.
पोलिसांनी दिलेल्या माहितीनुसार, फिर्यादी यांचा प्रेमविवाह झाला असून पती सागर भालसिंग हा कोणताही व्यवसाय करत नसून दारूच्या व्यसनाधीन आहे. लग्नानंतरपासून तो सतत पत्नीच्या चारित्र्यावर संशय घेत शिवीगाळ, मारहाण आणि जीवे मारण्याच्या धमक्या देत होता. मात्र प्रेमविवाहामुळे आणि पतीमध्ये सुधारणा होईल या अपेक्षेने त्यांनी यापूर्वी तक्रार केली नव्हती.
शुक्रवारी (ता. 10) सायंकाळी पाच वाजण्याच्या सुमारास पतीने पुन्हा चारित्र्यावर संशय घेत पत्नीला शिवीगाळ करून लाथाबुक्क्यांनी मारहाण केली. जीव वाचवण्यासाठी त्या घराबाहेर पळाल्यानंतर आरोपीने लोखंडी कोयता घेऊन पाठलाग केला. त्यावेळी कुटुंबातील सदस्यांनी त्याच्या हातातून कोयता काढून घेतल्याने मोठा अनर्थ टळला.
यानंतर पीडिता दिराच्या घरी गेल्यानंतरही आरोपी तेथे पोहोचला. त्याने कमरेचा बेल्ट काढून लोखंडी हुक असलेल्या बाजूने डोक्यावर जोरदार वार केला. या हल्ल्यात महिलेच्या डोक्याला गंभीर दुखापत होऊन रक्तस्राव झाला. त्यावेळी नातेवाईकांनी हस्तक्षेप करून तिला आरोपीच्या तावडीतून सोडवले.
दरम्यान, जखमी महिलेवर प्रथम खासगी रुग्णालयात उपचार करण्यात आले. त्यानंतर पोलिसांच्या सूचनेनुसार ससून रुग्णालयात वैद्यकीय तपासणी करण्यात आली. उपचारानंतर महिलेने लोणीकंद पोलीस ठाण्यात पतीविरुद्ध तक्रार दाखल केली असून पोलिसांनी गुन्हा नोंदवून पुढील तपास सुरू केला आहे.
