पुणे: पुण्यातील डेक्कन आणि सेनापती बापट रोड परिसरात रविवारी संध्याकाळी एक धक्कादायक प्रकार घडला. हातात धारदार चाकू घेऊन एक व्यक्ती भररस्त्यात फिरत असल्याने परिसरात भीतीचे वातावरण निर्माण झाले. समोरून येणाऱ्या नागरिकांकडे, विशेषतः महाविद्यालयीन विद्यार्थी आणि ज्येष्ठ नागरिकांकडे चाकू उगारत तो फिरत असल्याची माहिती समोर आली आहे. मात्र, एका महिलेच्या प्रसंगावधानामुळे मोठी दुर्घटना टळली.
पोलिसांनी ताब्यात घेतलेल्या व्यक्तीचे नाव पिनाक बाळकृष्ण वाघ (वय ४९, रा. सदाशिव पेठ) असे आहे. प्राथमिक माहितीनुसार, तो मानसिक आजाराने त्रस्त असून कोणताही व्यवसाय करत नव्हता. रविवारी घरातील कौटुंबिक वादानंतर त्याने संतापाच्या भरात घरातून धारदार चाकू घेऊन बाहेर पडल्याचे सांगितले जात आहे. त्यानंतर तो थेट डेक्कनमधील बीएमसीसी रोड परिसरात पोहोचला.
हातात चाकू घेऊन तो रस्त्यावरील फेरीवाला झोनमध्ये फिरत असल्याने नागरिकांमध्ये घबराट पसरली. याचवेळी एका महिलेने धाडस दाखवत त्याच्याशी संवाद साधण्याचा प्रयत्न केला. संभाषणादरम्यान तो अस्खलित इंग्रजी बोलत असल्याने तो उच्चशिक्षित असल्याचे तिच्या लक्षात आले. मात्र, त्याची मानसिक अवस्था आणि हातातील चाकू पाहता कोणताही अनर्थ घडू शकतो, हे ओळखून तिने तातडीने संबंधित व्यक्तीचा फोटो आणि माहिती लोकप्रतिनिधींमार्फत पोलिसांपर्यंत पोहोचवली.
माहिती मिळताच डेक्कन पोलीस ठाण्याचे पथक घटनास्थळी दाखल झाले. स्थानिक नागरिकांच्या मदतीने पोलिसांनी अत्यंत संयम आणि शिताफीने संबंधित व्यक्तीला घेरून ताब्यात घेतले. संपूर्ण कारवाईदरम्यान कोणालाही दुखापत झाली नाही.
या घटनेमुळे गर्दीच्या भागात मानसिक आरोग्याशी संबंधित व्यक्तींच्या सुरक्षित व्यवस्थापनाचा मुद्दा पुन्हा एकदा चर्चेत आला आहे. पोलिसांकडून संबंधित व्यक्तीची वैद्यकीय तपासणी करण्यात येत असून, पुढील आवश्यक कार्यवाही सुरू आहे.
