पुणे : अमेरिका आणि इराण यांच्यातील तणाव निवळल्याने आंतरराष्ट्रीय बाजारात कच्च्या तेलाचे दर घसरले आहेत. तेलाच्या किमती कमी झाल्याने जागतिक महागाईचा दबाव काही प्रमाणात कमी झाला आहे. या बदलत्या आर्थिक परिस्थितीचा थेट फायदा सोन्याला मिळाला असून गुंतवणूकदारांनी सुरक्षित पर्याय म्हणून पुन्हा सोन्यामध्ये गुंतवणूक करण्यास सुरुवात केली आहे. परिणामी, सोन्याच्या भावात सलग दुसऱ्या दिवशी वाढ नोंदवण्यात आली.
राजधानी दिल्लीमध्ये मागील दोन दिवसांत 24 कॅरेट सोन्याचे दर प्रति 10 ग्रॅम 940 रुपयांनी, तर 22 कॅरेट सोन्याचे दर 860 रुपयांनी वाढले आहेत. मंगळवारी स्थानिक बाजारात दोन्ही प्रकारच्या सोन्यामध्ये प्रति 10 ग्रॅम 10 रुपयांची किरकोळ वाढ झाली. सध्या मुंबईत सोन्याचा भाव 1,45,870 रुपयांपर्यंत पोहोचला आहे.
महाराष्ट्रात आज 24 कॅरेट सोन्याचा भाव अंदाजे 14,378 रुपये प्रति ग्रॅम आणि 1,43,781 रुपये प्रति 10 ग्रॅम आहे.अमेरिकन डॉलरमधील घसरण, बाँड यिल्डमधील घट आणि जागतिक बाजारातील सकारात्मक संकेतांमुळे सोन्याची मागणी वाढल्याचे बाजारातील तज्ज्ञांचे म्हणणे आहे.
दुसरीकडे, सोन्याच्या तुलनेत चांदीच्या बाजारात आज मंदीचे सावट आहे.दोन दिवस स्थिर राहिल्यानंतर मंगळवारी दिल्लीत चांदीचा दर प्रति किलो 100 रुपयांनी घसरून 2,39,900 रुपयांवर आला. मुंबई, कोलकाता आणि चेन्नईमध्येही चांदी याच भावाने विकली जात आहे.
