पुणे: देशभरातील लाखो वाहनधारकांसाठी दिलासादायक बातमी समोर आली आहे. केंद्रीय रस्ते परिवहन आणि महामार्ग मंत्रालयाने (MoRTH) प्रदूषण नियंत्रण प्रमाणपत्र (PUC) संदर्भातील नियमांमध्ये मोठा बदल करण्याचा प्रस्ताव मांडला आहे. या प्रस्तावानुसार, सहा वर्षांपर्यंत जुन्या खासगी BS6 वाहनांसाठी PUC प्रमाणपत्राची वैधता सध्याच्या एका वर्षाऐवजी थेट तीन वर्षे करण्याची तयारी सुरू आहे.
हा प्रस्ताव मंजूर झाल्यास BS6 वाहनधारकांना दरवर्षी प्रदूषण तपासणी करून PUC प्रमाणपत्र काढण्याची गरज राहणार नाही. अशा वाहनांची प्रदूषण चाचणी दर तीन वर्षांनी एकदाच करावी लागेल. त्यामुळे वाहनचालकांचा वेळ आणि खर्च दोन्हीची बचत होण्याची शक्यता आहे.
याच प्रस्तावात सहा ते दहा वर्षे जुन्या BS6 वाहनांसाठी दर सहा महिन्यांनी प्रदूषण तपासणी अनिवार्य करण्याचा विचार करण्यात आला आहे. तसेच जुन्या वाहनांसाठी नियम अधिक कडक करण्याचाही प्रस्ताव आहे. त्यानुसार BS4 वाहनांचे PUC प्रमाणपत्र दर सहा महिन्यांनी नूतनीकरण करावे लागेल, तर BS1, BS2 आणि BS3 वाहनांसाठी दर तीन महिन्यांनी प्रदूषण तपासणी बंधनकारक करण्याचा प्रस्ताव आहे.
BS म्हणजे ‘भारत स्टेज’ उत्सर्जन मानके. वाहनांमधून होणारे वायू प्रदूषण कमी करण्यासाठी केंद्र सरकारने ही मानके लागू केली आहेत. भारतात एप्रिल २०२० पासून BS6 मानके लागू करण्यात आली. BS4 नंतर थेट BS6 मानकांचा अवलंब करण्यात आला असून, BS6 इंजिनमध्ये कमी सल्फरयुक्त इंधनाचा वापर केला जात असल्यामुळे ही वाहने तुलनेने कमी प्रदूषण करतात.
मात्र, हा बदल अद्याप लागू झालेला नाही. केंद्र सरकारने सध्या केवळ मसुदा अधिसूचना जारी केली असून त्यावर नागरिकांकडून सूचना आणि हरकती मागवण्यात आल्या आहेत. या प्रक्रियेनंतर अंतिम अधिसूचना प्रसिद्ध केली जाईल. प्रस्तावाला अंतिम मंजुरी मिळाल्यास देशभरातील लाखो BS6 वाहनधारकांना मोठा दिलासा मिळण्याची शक्यता आहे.
