पुणे: चाकण परिसरात वारंवार होणाऱ्या दुचाकी चोरीच्या घटनांचा अखेर पोलिसांनी पर्दाफाश केला असून एका सराईत चोरट्याला अटक करण्यात यश मिळवले आहे. सीसीटीव्ही फुटेजची तपासणी आणि गोपनीय माहितीच्या आधारे चाकण पोलिसांनी ही कारवाई करत आरोपीच्या ताब्यातून चोरीच्या सात दुचाकी जप्त केल्या आहेत.
अटक करण्यात आलेल्या आरोपीचे नाव अशोक मधुकर सोनवणे (रा. राळेगण थेरपाळ, ता. पारनेर, जि. अहिल्यानगर) असे आहे. चाकण उत्तर पोलीस ठाण्याच्या हद्दीत सातत्याने दुचाकी चोरीच्या घटना घडत असल्याने पोलिसांनी या गुन्ह्यांचा तपास वेगाने सुरू केला होता. वरिष्ठ अधिकाऱ्यांच्या मार्गदर्शनाखाली विशेष तपास पथकाची नियुक्ती करण्यात आली. तपासादरम्यान परिसरातील विविध ठिकाणांवरील सीसीटीव्ही फुटेजची बारकाईने छाननी करण्यात आली. त्याचबरोबर गोपनीय बातमीदारांकडून मिळालेल्या माहितीचीही पडताळणी करण्यात आली.
तपासादरम्यान मिळालेल्या माहितीच्या आधारे पोलिसांनी अशोक सोनवणे याला ताब्यात घेतले. चौकशीदरम्यान त्याने चाकण उत्तर, चाकण दक्षिण, यवत आणि उरुळी कांचन पोलीस ठाण्यांच्या हद्दीतून दुचाकी चोरी केल्याची कबुली दिली. त्याच्या कबुलीनंतर पोलिसांनी चोरीच्या सात दुचाकी हस्तगत केल्या.
या कारवाईमुळे चाकण उत्तर पोलीस ठाण्यात दाखल असलेले चार, चाकण दक्षिण पोलीस ठाण्यातील एक, तसेच यवत आणि उरुळी कांचन पोलीस ठाण्यातील प्रत्येकी एक असे एकूण सात दुचाकी चोरीचे गुन्हे उघडकीस आले आहेत. या यशस्वी कारवाईमुळे परिसरातील वाहनचोरीच्या घटनांवर आळा बसण्यास मदत होणार असल्याचा विश्वास पोलिसांनी व्यक्त केला आहे.
ही कारवाई पिंपरी-चिंचवडचे पोलीस आयुक्त विनयकुमार चौबे आणि चाकण उत्तर पोलीस ठाण्याचे वरिष्ठ पोलीस निरीक्षक जितेंद्र कदम यांच्या मार्गदर्शनाखाली करण्यात आली. पोलीस उपनिरीक्षक चंद्रशेखर मोरखंडे यांच्यासह भैरोबा यादव, प्रितम ढमढेरे, योगेश कोळकर, महेश कोळी, शिवाजी लोखंडे आणि अक्षय सांडभोर यांनी या मोहिमेत सक्रिय सहभाग घेतला.
