पुणे : कोरोनाचे उगम स्थान मानलं जाणाऱ्या चीनमध्ये कोरोना विषाणूने पुन्हा एकदा डोकं वर काढलं आहे.तिथल्या आरोग्य विभागाने दिलेल्या अहवालानुसार, सध्या ओमिक्रॉनचा NB.1.8.1 हा नवीन व्हेरियंट वेगाने पसरत आहे. जुलैच्या तिसऱ्या आठवड्यात कोरोना चाचण्यांचा पॉझिटिव्हिटी दर 16.3% पर्यंत पोहोचला आहे, जो आधीच्या आठवड्यात 12% च्या आसपास होता.त्यामुळे.आरोग्य यंत्रणा अलर्ट झाली आहे.
आरोग्य तज्ज्ञांच्या मते, बहुतांश रुग्णांमध्ये ताप, सर्दी, खोकला आणि घशात खवखव अशी सौम्य लक्षणे दिसून येत आहेत. संसर्ग झालेले रुग्ण साधारणपणे 5 ते 7 दिवसांत पूर्णपणे बरे होत आहेत. उन्हाळ्याच्या दिवसांत लोक बंद खोल्यांमध्ये सतत एअर कंडिशनर (AC) चा वापर करतात; यामुळे अशा हवेत विषाणूचा प्रसार होण्याचा धोका अधिक वाढतो, असे तज्ज्ञांचे म्हणणे आहे.
या नव्या व्हेरियंटचा प्रसार जरी जलद गतीने होत असला, तरी तो पूर्वीच्या व्हेरियंट इतका धोकादायक नाही. रुग्णालयात भरती होणाऱ्यांचे प्रमाण किंवा मृत्यूचा दर न वाढल्याने सध्या चिंतेचे मोठे कारण नाही. चीनचा आरोग्य विभाग या परिस्थितीवर सतत लक्ष ठेवून आहे.
चीनमधील वाढत्या आकडेवारीमुळे भारतात सध्या कोणताही मोठा धोका किंवा असामान्य परिस्थिती निर्माण झालेली नाही. त्यामुळे भारतीय नागरिकांना घाबरून जाण्याची मुळीच गरज नाही. तरीही, सुरक्षिततेचा उपाय म्हणून ज्येष्ठ नागरिक, लहान मुले, गर्भवती महिला आणि गंभीर आजार असणाऱ्या व्यक्तींनी गर्दीच्या ठिकाणी खबरदारी घेणे गरजेचे आहे.
दरम्यान जून महिन्यात चीनमध्ये जवळपास 79,000 नवीन रुग्णांची नोंद झाली असून 130 जणांची प्रकृती गंभीर होती, तर एका रुग्णाचा मृत्यू झाला होता.
